Een Amoreus Liedeken.  Al waer ic half doot  Ja met fenijn vergeuen  Door v schoon Lief minioot  Soude ick vercrijghen tleuen,  Maer sonder v schoon lief verheuen,  Al waer mijn Hart noch so ghesont // In corter stont  sou metten strael des doots werden ghewont.     Want mijn hart siel en lijf  Ghij Lief op v ghenade,  V knecht ick eeuwich blijf,  Al vielt tot mijnder schaden  Maer v goetheyt wijs van beraden,  Voorcomen sal alsulce verdriet // Dat hoop ick niet  Door trou en eer die mijn van v gheschiet.     Menighen tijt certeyn  Gae ick mijn occuperen,  Om v liefden reyn,  Wel te recumpenseren  Tot dancbaerheyt sterckt mijn begheren,  Geen dinck en valt mijn al so swaer // O Lief eerbaer,  Als v absentie teenigen tijt dats claer     Want al joncheits iolijt  Staet mijn als droefheydt regt  Daer ghy lief niet en zijt.  In wient al is gelegen  Sonder v ick geen vreucht can pleghen,  Dat sal ic tonen metter daet  Lief delicaet // So lang die asem wt mijn monde gaet.     Deuchtsame schone vrou  Princes waert om beminnen,  Blijft v dienaer getrou  Verandert niet van sinnen, [p. 3]    Laet v van geen opziers verwinnen,  Mijn Liefde en sal tot geender tijt,  T'zy wiet benijt  Vergaen voor dat die doot  Ons t'leuen slijt.