Een nieu Liedeken, Op die wijse: Ghy ghildekens alle ghelycken.  Compt al ghy Venus dierkens,  En wilt my helpen trueren  Mijn lief zoet van manierkens,  En mach my niet ghebueren  Mijn herteken wil my schueren, [p. 18]    Ick ben in lijden groot  Zal dit noch langher dueren  Van liefde blijf ick doot.     Mijn lief soet ende reyne,  Quam my veel liefden toghen  Eylaes t'was sonder meyne  Dat sie ick nv voor ooghen  Want zy heeft my bedroghen  Noyt man in meerder noot  Sal ick dit langher gedoghen  Van liefden blijf ick doot.     Nochtans sal ick beminnen  Bouen alle Gout seer fijnen  Mijn Lief seer soet van sinnen  Ja bouen claer Robijnen  Liet zy haer ooghen schijnen  Tot my, ick seght v bloot  Hierom ben ick in pijnen,  Van Liefden blijf ick doot.     Niemant en mach ick claghen,  Mijn druck en sware lijden.  Dat ick alleen moet draghen  Nu ende tot allen tijden,  Mocht ick noch eens verblijden  En rusten in haer schoot  Nu moet ick staen bezijden  Van liefde blijf ick doot.     Princesse altesamen  Die sijt in dese contreyen,  V lief en wilt niet beschamen  Maer wilt haer eer verbreyen,  In dese coele Meyen  Dat soete Roosken root,  So ghinckse van my scheyden  Van liefde blijf ick doot.