Een nieu Gailiaerde, Opten Caracossa.  Cupido stralen // doet my versuchten,  Leuen eylaes in swaer verdriet  In Venus sale, wil ick gaen vluchten,  Op dat zy nv mijn lijden aensiet,  Twelck ic nv smaeck, om die liefste mijn  Zy is mijn troost en mijn medecijn  Zy kan ghenesen mijn sware pijn [p. 19]    Waer door ic by naest geheel verdwijn.     Vercrijgh ic gaen tot deser stonden,  Van haer de liefste ghepresen schoon  Tot deser spatie, wort ick ontbonden,  Want zy spant int hert de croon  Sy ist die my verhueghen doet  Int aenschijn van haer wesen soet  Want haer absentie is bitter roet  Om haer te derven kost my mijn bloet.     Suldy verhueghen in mijn bederuen  Oft verblijden, in mijnen doot?  In v vermueghen is mijn steruen  Dus gheeft my troost o bloeme soet  Troost my met uwer roder mont  So sal mijn herte dan zijn ghesont,  Twelck nv eylacy is duer wont  Ghequetst al in mijns herten gront.     Oorlof Princesse, doet mijn begeren,  Tot uwen dienaer v doch verueert  Als mijn voochdisse, wel triumpheert  Gheeft troost de troost van v begheert.  Aensiet mijn lijden en swaer torment  Daer Cupido my heeft verblent  T'welck v schoon Lieueken is wel bekent  Dus laet v droefnis zijn ten ent.