[p. 23] Een Amoreus Liedeken, Op die wijse: Pour ungepayste.  Dat ick om een beelde soet  Dus langhe moet treuren  Daer noyt en was dan liefde ghoet  Noch en heeft geweest mijns leuens dueren  Door nijders cueren is my gheschiet  Voor een cleyn vreucht so menich verdriet     Haer aenschijn claer geeft my comfoort,  Als ick aensie die schoonste figuere,  Daer is een ander veel badt ghelooft  Sy sluyt my buyten der dueren  Sy gheeft my kuere als zy my siet  Voor een cleyn vruecht zo menich verdriet     O Venus ick claghe v mijn noot  Dat ick mijn soete lief moet deruen  Een kusken aen haer mondeken root  Een troostelick woort laet my verweruen  Dat ick moet steruen, mijnen druck aensiet  Voor een cleyn vruecht so menich verdriet     Nu rade ick elcken Amorues  Dat hy zijn lieueken niet en vergramme,  Haer wesen is so coragues  Spreect een woort doch schoon lief watdy misquame  wacht v van blame, quade niders tongen vliet  Voor een cleyn vruecht zo menich verdriet