Een schoon ouerlants lied, van schoon Elselyn, op de wijse: alst beghint  Des hadde een swaue een dochterlijn,  Sy en woude niet langer dienen,  Rock en mantel woudese haen,  Twe schoenen met smalen riemen  Schoon isser mijn Elselyn.     En wildy Rock en mantel haen,  Twe schoenen met smalen riemen  So ghaet te Rusburch inde stadt  En grote Heeren dienen,  Schoon isser mijn Elselijn.     Doe zy Tausburch binnen quam, [p. 25]    Al op die enghe straten  Sy vraechde na den besten wijn  Daer Ruyter ende knechten saten,  Schoon isser mijn Elselyn.     Ende doe zy opter stouen quam,  Men bracht haer eens te drincken,  Zy liet haer ooghen omme ghaen  Den beker liet zy schincken  Schoon isser mijn Elselijn.     Sy namen die teerling inde hant  Men beghon daer te spelen  Die daer die meeste ooghen worp,  Sliep by der schoonder vrouwen  Schoon isser mijn Elselijn.     Hy nam schoon Elselyn byder hant  By haer snewitser handen  Hy leydese daer hy een beddelyn vant,  Dat groene wout ten eynde  Schoon isser mijn Elzelyn.     Hy sette haer neder op die banck  Sy en dede niet dan weynen  Noch heb ick stoute broeders drie  Een rijcken vader ter heymen,  Schoon isser mijn Elselyn.     Dats hebdy stoute Broeders drie  Een rijcken vader ter heymen  So muechdy dit Jaer een hoerken zijn,  Hoe bleefdy niet ter heymen,  Schoon isser mijn Elselijn.     Maer doen zy opter gaffen trat  Bekende haer huer Broeder.  Och Suster sprack hy Suster mijn,  Hoe is de reyse vergangen, Schoon isser. etc.     Och suster sprack hy Suster mijn,  Hoe is die reyse verghangen  Dat uwen rock voor is so kort,  Ende achter veel te langhe  Schoon isser mijn Elselijn.     Broeder sprack zy broeder mijn,  Dat reetste aen mijn ere  Hadde my dat een anderen ghedaen,  Hy zoudet weder keren.  Schoon isser mijn Elselyn.     Die ons dit Liedeken eerstmael sanck [p. 26]    Hy geerne ghesanghen  Een vroom Lansknecht is hy ghenaemt,  Tausburch al binnen der stede  Schoon isser mijn Elselyn.