Een nieu Liedeken, Op de wijse: alsoot beghint.  Die Mey zeer excellent,  Ontspruyt met zijnen bladen  In desen soeten tijt, [p. 29]    Verblijt v met iolyt  En acht gheen nyders quaet,  Comt nu al in present  Wilt Venus niet versmaden  Ziet hoe het met v ghaet  Cupido pertinent sal v altijt beraden  Wt Liefden delicaet  Dus haest v metter daet  Wilt wt den slaep ontspringen,  Wilt singhen met danck  Die Mey kan vruechde inbrengen  Waer dese kunst is cranck     Ceres groot vermaert,  Doet nu haer loff ontspruyten  Zeer lieflick aen elcken kant,  Playsant en triumphant  Staet nu haer lof zeer soet  Dus comt al onbeswaert  By fonteynen en conduyten  Daer Venus v leyen doet  Ghy muzeen onbeswaert,  Comt al met Herpen ende met Luyten  Want Apollo hem oock spoet  Deana met ootmoet // comt ooc in dit rosier  Wilt iubileren en spaceren toont hier  Die Mey doet vruecht vermeren,  So soet is zijn bestier.     Reyn liefde eerbaer,  Wilt met v Lief bedrijuen  Na oprecht minnaers aert  Onbeswaert en onveruaert  Wilt nu bedrijuen vruecht,  So sal Juno voorwaer  Dan doen na v gherijeuen  Want in reyn Liefde heeft zy ghenuecht  Haer ghunste claer  Salt altoos by v blijuen  Aldus verhuecht in duecht  Comt voor ghy ionghe iuecht  Voort Mercurius soet gheluyt,  Die snaren die clincken  Smeken moet des nijders ruyt  Auroram sietmen blincken,  Alle dinck heeft zijn virtuyt.    [p. 30]    Princesse ghepresen schoon,  Wilt dit in danck ontfanghen  Al is die konste cleyn,  Pleyn is gheschiet certeyn  Wt Liefden minioot  Ghy spant alleyn de croon  Wy groeten v met sanghe,  Als Venus dienaers bloon  Int swerelts hoon,  Staet na v verlanghen  Wt rechter liefden groot,  Cupido die therte doorschiet,  Mijn sinnen blijuen in pijn  Liefde kant al verwinnen  Dit is soet fenijn.