Een Liet vande bron Lutsenburch alzoot beghint.  Die my te drincken ghaue  Ick songhe hem een nieu liet  Al van my Vrouwe van Lutsenburch,  Hoe zy haren Lantshere verriet.     Sy dede een briefken schrijuen [p. 34]    So verre in Guilker landt  Tot Frederick haren boele  Dat hi soude comen int lant     Hy sprac tot zijnen knape  Nu sadelt my mijn peert  Tot Lutsenborch wil ic rijden  Het is nu wel rijdens weert.     Als hi te Lutsenborch quam  Al voor dat hoghe huys  Daer lach de valsche vrouwe,  Tot haerder tinnen wt     Hi sprac god groet v vrouwe  god geeft v goeden dach  Waer is mijn heer van lutzenborch  De ic te dienen plach     Ick en derf v niet wel seggen  Ic en wil v niet verraen.  Hy is heden morgen,  Met sijnen honden wt iagen gegaen.     Hy reedt heden morghen  Al in dat soete dal  En daer suldy hem vinden  Met zijnen hondekens al.     Hy sprac tot zijnen knape  Nu zadel my mijn paert  Te dale waerts wil ic rijden  Het is mi wel ridens waert.     Als hy bider iachten quam  Al in dat soete dal  Daer lach die edel heere  Met sijnen hondekens al     Hi sprac god groet v here  God geue v goeden dach,  Ghy sult niet langer leuen  Dan desen haluen dach     Sal ick niet langher leuen  Dan heden desen dach  So mach ict wel beclaegen  Dat ic oyt my vrou aensach     Hy sprac tot zinen knape  Spant uwen boghe goet  En schiet mi here van Lutzenborch,  In sijns harten bloet     Waerom soude ic hem schieten,  Waerom soude ic hem slaen  Ick heb wel seuen iaer  Tot zijnder tafelen gegaen     Hebdy wel seuen iaren  Tot zijnder tafelen gegaen  So en dorfdi hem niet [scieten]  Noch niet ter doot slaen.     Hi tooch wt zijnder sceiden,  Een mes van stale goet  Hi stac mijn here van Lutsenborch,  In sijns harten bloet.     Hy sprac tot zijnen knape  Nu sadelt my mijn paert  Te Lutsenborch wil ic rijden  Tis my wel ridens waert.     Als hy te lutzenborch quaem  Al voor dat hoghe huys  daer quam de val[se] vrouwe  Van haerder tinnen wt.     Vrou god segen v vrouwe  God geue v goeden dach  Vwen wille is bedreuen [p. 35]    Tverraderie is volbracht.     Is mijnen wille bedreuen,  Hebdy mijnen sin volbracht  Zo doet my sulcken teecken,  Dat ic daer aen gelouen mach.     Hy tooch wt zijnder sceyden  Een swaert van bloede root  ziet daer ghy valsre vrouwe  Ws edel lantsheren is doot.     Sy trock van haren halse  Van peerlen een cranselijn  Hout daer mijn liefste boele  Daer is de trouwe van mijn     Vwe trouwe en wil ic niet,  Ic wilse niet ontfaen,  Ghy mocht nu ooc verraen  Gelijc ghy uwen lantshere Hebt ghedaen.     Hy tooch wt zijnder mouwen  Een siden snoerken fijn  Hout daer ghi valsche vrouwe  Ghy sulter by bedrogen sijn.     Te Lutsenborch op de mueren,  Daer loopt een water claer,  Daer sit vrou van Lutsenborch,  Int heymelijck ende int openbaer.