Een nieu Liedeken: Op de voys van Syon.  Een Amoreus een fiere ghelaet,  Heeft mijn ionc harteken deurwont  Geeft zy my gheenen raet,  Ick sterue in corter stont,  Haer Amoreus gheschichte,  Haer lieflicke rooder mont  Haest v ghy Venus Nichte  Maeckt uwen dienaer ghesont.     Bouen Juno ghepresen,  Staet ghy int harte gheprent  Mocht ick v dienaer wesen,  Al ben ick nu absent,  Schoon Lief wilt v vermeeren,  Reyn bloemkens seer excelent [p. 40]    Laet ons tsamen boeleren,  Ontfangt my in v Conuent.     V weerde soete Lieueken,  Comt voor v Vensterken staen  Ontfangt van my dit brieueken  Daer in suldy vinden staen  Mijn ionste en eerbaerheden  Reyn edel Vrouwelick graen,  Wilt doch in dancbaerheden  V schamel dienaer ontfaen.     Ick hoorde de Nachtegael singhen  En ick hoore hem maken groot gheclach  Ick en can my niet bedwinghen,  Ick verwondere my wattet wesen mach  Mijn hemdeken wil ick aenschieten,  Ende mijn vensterken open doen  Hoe sout my moghen verdrieten,  Die Mey staet lustich en groen.     Dat schoon kint heeft wt ghekeecken  Die Maen scheen licht en claer  Haer Lieff quam daer ghestreken,  En sprack minnelick teghen haer  Met pijpen en tamboren  Dede hy haer een Amoreus ghelaet  Die liefde stont te roeren,  In dit schoone kindt delicaet.     In een Prieel met roosen  Dat daer beneden stont  Daer hebben zy een langhe poose  Gaen spreecken mont al teghen mont  Sy hebben gaen domineren  En Venus bant ontdaen  Daer ginghen zy in studeren  Elck was met minne beuaen.     Met also scherpen sinne  So waer zy noch beraen,  Dat eedel Tresoor van minnen  Dat hebben zy tsamen ontdaen  Haer lieder harte heeft hem ontsoncken,  Dat dede der minnen dorst  Sy hebben malcander gheschoncken  Een ghebodt der Amoreusen lust.     Oorloff reyn edel kerssouwe  Welrieckende Rosemareyn [p. 41]    Schoon Lieff blijff my altijt getrouwe  Mijnder harten medecijn  Want ick nu moet henen varen  Al doet het mijnder harten pijn  Godt wil v in deuchden sparen  Als ick van v moet zijn.