Een Amoreus Liedeken, Op die voys: alzoot begint.  Een Venus dierken heb ic wtvercoren  Gheen schoonder en weet ic nu terstont  Om haer soo wil ick vreucht oorboren  Int aensien van haren lachende mont  Haer keelken wit haer borstkens ront  Maken my vrolick van sinne.  Schoonder en was noyt van moeder geboren  Tis recht dat ickse beminne.     Ghelijck gout is haer hayr van coleure  Twe oochskens ter amoreusheyt snel,  Twee borstkens ront soet van natuere  So heeft mijn lieueken dat weet ick wel  Sedich van Gheest ende niet rebel  Sy is mijnder harten een keyserinne  Ic en weet ter werelt geen lieuer creatuere  This recht dat ickse beminne.     Noch heeft zy een hoochmoedige coragie  Ende daer toe eenen fieren ganck  Int triumpheren bedrijft zyragie,  Ic en hoorde mijn dagen noyt soeter sanc  Dan zy en bedrijft met haren voys geclanc  Het dunct my puer een Goddinne  Ghefactsoneert is zy als een ymagie  This recht dat ickse beminne.     Ic en can vergeten mijns liefs maniere  Haer vriendelick wesen, haer fier gelaet,  Crijghe ic geen troost door haer bestieren  Soo wert mijn hart heel desperaet  Mocht ic met haer mijn troost mijn toeverlaet  So waer ick blijde van sinne  Vruecht en solaes soude ick hantieren,  This recht dat ickse beminne.     Princesse ient de mijn vreucht doet breden  Al mocht ick hebben van goude swaer  Tgewicht van v ic en sal van v niet scheden  Ghy blijft mijn liefste weder paer [p. 42]    Want an v Lief en weet ick genen maer  Dan alle vreucht en ghewinne  Haer wesen reyn en mach my niet verleden,  This recht dat ickse beminne.