Een out Liedeken, Op de wijse: van die blauwe schuyt, of danct God den here  Een aerdich vrouken heeft my bedroghen  Daer ick op was vergeckt  Haer smekende woorden zijn al gheloghen  Dat vinde ick nu perfeckt,  Zy is my te doortreckt,  Te dubbelt oock van gronde  Dus keer ick my van haer  Zy papter so veel met haren valschen monde  Ick en achtse niet een haer.     Ghesellekens wilt v sinnekens keren  Van sulcken schoon samblant  Want sy sal v plucken en minnen leeren  Ja hebdijt wel inde hant  Daer af heb ick verstant,  Ghaet Vlaenderen heel int ronde.  Gheen wijf so wanckelbaer  Zy paeyter so veel met haren valschen monde  Ick en achtse niet een haer.     Nu laet ic een ander zijn goet verquijsten  Van sinnen iock en mal  Want zy met haer subtylen listen  V zeer wel plucken sal,  Ende vallen eenen val  Dits daghelicx bevonden  Met haer, nu hier nu daer,  Zy peyter zo veel met haren valschen monde [p. 50]    Ick en achtse niet een haer.     Wat heb ick met haer altijts versleten,  Ick en spaerde ghelt noch ghoet  Nu ben ick vanden bach ghebeten,  Ick en weet niet wie my doet  Dies ick my bedwinghen moet  Te hooren haer saronde  Dat segghe ick v voorwaer  Sy paeyter soo veel met haren valschen monde  Ick en achtse niet een haer.     Jongvrou ghy laet nu voor v hielen,  Ghy zijt daer voor bekent  Al in een Rosbaer met dry wielen,  Sult ghy nemen v ende  En ick triumpheren tent,  Als ghy tot allen stonden  Zult zitten in lyden swaer,  Sy paeyter soo veel met haren valschen monde  Ick en achtse niet een haer.     Adieu ghy waert eens mijn Princesse  Met uwen soeten rel,  Adieu ghy paeyter vyue oft sesse,  Toest [.]amien en wuyten wel,  Adieu u mijn dubbel vel,  Dus keer ick mi van v omme  Doen ick en vraechde nerghens naer  Sy paeyter soo veel met haren valschen monde  Ick en achtsen niet een haer.