Een nieu Liet, Van Paris tot Helena  Lief wtvercoren, Lief triumphant  Wiens liefd te voren  Mijn hart doorbrant  Eer ic anschouwe, v claer aenschijn  Weest my ghetrouwe, Vrijt my van pijn  En neemt doch acht, op mijn gheclacht  Want Venus macht, dunct mij by v te zijn.     Tgeen ick beginne, Is niet om niet  Twas een Goddinne, Die my dit riet  Al zydy verheuen, Schoonder dan schoon [p. 52]    My zydy gegeuen, Voor mijn eygen soon  Weest niet verstoort, Lief om dit woort  Maer geeft confoort  Ghy spant in thert de Croon.     Mijns Vaders tijcke, groot en playsant  Heeft gheen ghelijcke, In Griecken lant  Een Conincx Soone: Ben ick bekent  Mijn Rijc mijn Crone, En heeft geen end  Troyen is mijn, Het salder v zijn  V schoon aenschijn, Maect ghyt weerdich bent     Wilt my niet versmaden, Eer ghy kent  Al ben ick beladen, Met groot torment  V schoon Figuere, Heb ick bespiet  Dat doet mijn trueren, Ja swaer verdriet  Maer hooch van moet, Machtich van goet  Edel van bloet, Ben ick al weet ghijt niet.     Groot is v macht: En groot v goed  Hooch is v gheslacht: Edel v bloet  Maer v Vader machtich, Diet al regeert  Door liefde crachtich, Is dick verkeert  Venus bestaen, Heeft hem doen gaen  Wit als een swaen, Daer hem die liefde keert     Princes der minne, Aensiet den brandt.  Die een Godinne, In mij heeft geplant  Het is te vooren: Ghepropheteert  Ick ben verlooren, Soo ghyt begeert  Weest mijn ghetrou, Schoon eedele vrou  Als ick v sou: Soo suldy zijn gheeert.