Een dans voorsang, Op de wijse: alst beghint. Ghemaeckt van een ionghe dochter.  Ghy nyders quaet van doene,  Van svyants aert muecht ghy wel zijn  Ghelijck de schorpioene,  Met haren steect steken fenijn  Al hebt ghy nu de wille van mijn  Het mach dueren een cort termijn,  Alle dinck en sal niet eewich zijn     Ick hadde v wtvercoren ghoet lief,  Die tijt is nv ghepasseert  Ick mach sien noch horen v brief,  Tis al ghebroleert  Tis al verloren, tis al verteert,  Die in dat boeck van minnen studeert  Hy vint hem seluen gheabsolueert     Ick heb om uwen twille ghoet lief,  Die hant gheslaghen aenden ploech  Die ick v laestmael loofde met gherief,  Dat gheschiede des morghens vroech  Tis hier tis daer men vint men boef,  Schoon lieveken hebt ghy siels ghenoech  Ick vinde my seluen geen troost behoef.     Mijn vrienden en maghen ghoet lief  Die zijn mijn teghenspoet  Een ander weder toe kiesen tot gherief,  Die minne waer niet zo soet  Tis al om tvermaledijde ghoet,  Die altijt raet van vrienden doet  Sijn hert sal kiesen die hij laten moet     Had ghy die kanne stille doen staen,  Daer al dat ghoet aencleeft  Al hebt ghy nv v wille ghedaen,  Tis dat ghy om my niet en gheeft, [p. 57]    Tis beter dat ghij met een ander sneeft,  Dan ghy met my in onvreden leeft,  Tis quaet te drincken de geen dorst en heeft     Nu rade ick het alle de Vryers fijn  Die hier te dansen ghaen met  Ten besten laet v raden lief mijn  Dat ghy met v trouw niet en gheckt,  Ghy spreeckt so haest een woort so net  Worter yet belooft het wort belet  Het is v Huysvrouw al voor Gods wet.