Een nieu liedeken, Op de wijse: alzoot beghint.  Ic seg adieu, wy twe moeten scheyden  Tot op een nieu, so wil ick troost verbeyden  Ic laet by v het herte mijn  Want waer ghy zijt daer sal ic zijn  T'sy vruechde oft pijn,  Altijt sal ic v vry eyghen zijn.     Mijns zins gequel, dat doet mi dicwils trueren,  Haer Liefde rebel  Die doet my therte schueren  T'scheyden van v doet my den noot  Ic blijf ghewont ick segt v bloot  Schoon bloeme minioot  V eyghen blijf ick tot inden doot.     Ick danck o lief // Reyn minlick Lief ghepresen  Voor allen gerief, [p. 88]    Zo wilt mijn doch ghenesen  Die nyders fel, met haer fenijn  Sy hebben belet ons blijden aenscheyn,  Op dit termijn,  Altijt sal ick v vry eyghen zijn.     Mijn hoop is troost, Fortune sal noch keren  Lief op mijn glooft,  So sal mijn vruecht vermeren  Al most ick deruen mijn conroot,  En blijuen in dit lijden groot  Swaerder dan loot  V eyghen blijf ick tot inder doot.     Adieu van mijn  So sidy nu ghescheyden,  Een ander met dijn  Sal hem nu ghaen vermeyden  Coragiues als deuerswijn,  Een amorues kranselijn, van peerlijn  Suldy draghen,  Altijt sal ick v vry eyghen zijn     Adieu schoon Stadt,  Adieu prieel vol vruechden,  Reyn maechdelick vadt  Daer wy tsamen verhuechden,  Ghedenckt den troost die ghy my boot,  Ghy zijt mijn Lief die ick noyt en vloot,  Ic segt v bloot, v eygen blijf ic tot inden doot     Twee harten in malcander gheuoecht,  Daer beyde seer wel aen ghenoecht,  Wat mach daer ter werelt beter sijn,  Dan te leuen in sulcken schijn.