Een nieu Liedeken, Op de wijse: t'swinters Somers euen groen  Int hert heb ick vercoren,  Een bloemken soet en guer.  Zy doet my vruecht oorboren,  Oock lijden groot ghetruer.  Zy doet my vrolick singen,  Oock suchten menich stout,  Ick moet dit al ghehingen  Noch blijf ic in haer ghewout.     Na mijn Lief wil ick wachten,  Alle tijt onghe[...]eerd]  Veel daghen ende nachten,  Voor den tijt eens anders keert  Ghelijck Jacob volherden,  Twe seuen Jaren wt  Eer hem Rachel mochten werden  Tot zijnder liefste bruyt.     Aen haer heb ic bevonden  Al dat mijn herte behaecht  Venus heeft my ghesonden,  Daer ick lange na hebbe gheiaecht  Ghelijck Venus Paris beloofde,  Helena dat schone wijf  Die hy wt Griecken roofde,  Waer duer quam groot ghekijf.     Nemmermeer en sal ick laten,  Te zijn met haer verhuecht  Hoe wel dat nijders haten,  En benyen onsen vruecht  Ghy valsche Junos kinderen,  Van binnen heel verdwijnt [p. 94]    Seght my wat macht v kinderen  Dat die sonne int water schynt.     Eer moet aen haer beclyuen,  Die my haer conste boot,  Haer eyghen wil ick blyuen  Altijt tot inden doot  Ghelijck Piramus ghetrouwe  Doch sulcken druck aenbiet  Die om Tisbe die schone vrouwe,  Sijn ionghe leuen liet     Iuoren zijn haer tanden.  Haer lipkens root als een corael  Daer toe snewitse handen,  Bruyn ooghen tenemael  Apelles noyt en wrochte,  Lieflicker beeldeken ient  Och of ick altoos mochte,  By haer oock zijn present.     Keer weder druckich ghepeysen,  Ghy doet mijn hert zo we  Dus moet ick seluer reysen,  Om mijn lieueken ouer ze.  O Aeole wilt wayen,  Neptune gheeft my bloet  Om mijn liefken te payen,  Want ick by haer wesen moet.     Princesse     Naest Venus die desse,  Gheef ick haer den hoochsten prijs,  Ick bid v mijn Princesse  Leeft docht na mijn advijs,  Cupido met zijnen toortse  Ontsteeckt mijn hert gheheel  Eylacy lief ic lyde foortse  Helpt my uyt mijn ghequel.