Een Tafel Liedeken, Op de wijse: Jeucht en deucht.  Ic breng mijn naeste gebuer en dronc  Ick hoop hy sal dat wachten  Ick gunt hem wt mijns hertsen gront  Met vrolicke ghedachten  Mijn wijn, fijn eedelen wijn  Sober wilt ghy ghedroncken zijn  Anders so zijt ghy fenijn  Van wonderlicke crachten.     Als ick den eedelen wijn aenschou,  Vergheet ick mijn labueren  En voeghet in die beste vou  En laet Fiolen trueren,  Wijn wijn, fijn eedelen wijn  Sober wilt ghy ghedroncken zijn,  Anders so zijt ghy fenijn  Men moet v dick besueren.     Den wijn proeftmen by den smaeck,  Als ons die oude leeren  Hy verdrijft so menighe Mens den vaeck  By nacht te bancketeren  Wijn wijn, fijn eedelen wijn  Sober wilt ghy ghedroncken zijn  Anders so zijt ghy fenijn,  En wilt den Mens regeren.     Die wijn is wt, den Croes is leech  Een ander doe ick schencken  Mijn dunckt ick creech so goeden deech  Ick can gheen droefheyt dencken,  Wijn wijn, fijn eedelen wijn  Sober wilt ghy ghedroncken zijn  Anders so zijt ghy fenijn,  En doet den Hont wel hincken.     Ontfangt van my den Beeker net,  Mijn vriendekens wt vercooren  En drinckt het wt met eenen sedt, [p. 101]    Als ick v dee te voren,  Wijn wijn, fijn eedelen wijn  Sober wilt ghy ghedroncken zijn,  Anders, so zijt ghy fenijn  Ghy doet ons vreucht oorbooren     Noe die heeft den Wijn gheplant,  Al door beuel des Heeren  Godt den heer sy loff en danck  Diet al hier doet vermeren  Wijn wijn, fijn eedelen wijn,  Des menschen hart verheucht ghy fijn,  Ghy zijt een goeden Medecijn  Als ons die schrift doet leeren.