Een nieu Amoreus Liedeken, Op die wijse: alzoot beghint  In groot ongeluck ben ick gebooren  Want Fortuyn my rebelleert  Swaer ghepeyns comt my te vooren,  Waer deur mijn vreuchde declineert.     Om v absentie is mijn versuchten,  Eerbaer Maechdeken delicaet  Want ick sorghe voor quade gheduchten  Die veel gheschieden door nijt en haet     Hout v beloften gheschiet int scheyden,  Van v en my ghy weet wel waer  So sal ick hopende, den tijt verbeyden  Hoewel een uyr my druckt een iaer.     Al mocht my Cresus schat ghebeuren,  En Alexanders Rijckdom groot  Jae des Werlts vreuchde te dueren,  Sonder v Liefken waert my die doot.     Niemant en can mijn gheest vermaecken  Dan ghy o edel Vrouweken graen  Om v alleen moet ickse versaecken,  Hoe rijck hoe schoon hoe wel ghedaen.     Nacht en dach is mijn ghedencken,  Ons diuizeren sonder pijn,  Twelck nu sal falgeert en my gaet crencken  Dus weest ghenadich onze mijn     Ewighe vruechde sal ick ghenieten  Is dat ghy mijns ghenadich zijt  Pijn noch arbeyt sal my verdrieten,  Ontfermt ghy mijnder nv eer tijt.    [p. 103]    Princesse.     So sal Princesse alle mijnen rouwe,  En dangier gheheel van my vlien  Dus blijft v dienaer in liefde ghetrouwe,  En laet my troost als nu gheschien.