Een nieu Liedeken, Op die wijse: Van quater brande.  Met gantscher bedruckter harten  Claech ic v mijn swaer torment  Want ick lijde druck en smerte,  Om dat ick moet zijn absent  Van de liefste reyne, die ick certeyne  Met gantscher harten bemin  Schoon Roosemereyne, ghy zijt alleyne  Vercoren in mijn zin.     Hoe soude ick v connen vergeten  Dien ick alsoo seer bemin [p. 113]    Want ghy zijt in mijn gheseten  Bouen Venus die Godin  Onder tshemels trone, spant sy de crone  Die int Hart verheuen is  Want ghy zijt schone, Net van persone  Van leden zijt ghy fris     Ghelijck die maen is blinckende schone  Bouen alle sterren cleyn  Also spant zy voorwaer die crone  Bouen alle Vrouwen reyn  Mocht ick eens wesen, vry sonder vresen  By v schoon Bloemken ient  Schoon lief ghepresen, ghy cont ghenesen  Mijn druck en swaer torment.     Lacy moet ick nu staen besiden,  Dat door dese clappers fel  Die mijn liefd' t'uwaert benijden,  En maecken mijn sinnekens rebel  Door uwen cueren, moet ick besueren  Int harte lijden groot,  Tot alder uren so moet ick treuren  Om v reyn roosken root.     Weest ghedachtich Thisbe schoone,  Welck verwacht haer soete Lief  Piramus quam aldaer ten toone,  Niet vindende zijn liefste Lief  Mistroostich alsoo dat schene, om zijn lief allene  Hem selfs aen deed' die doot,  Dat siende Thisbe reene, zy viel in wenen,  Sterf by haer lief die doot.     Venus met uwen straele  Hoe valt ghy my dus rebel  Wat eer cont ghy aen my behalen,  Dat ghy my doet dit ghequel  Ghy hebt mijn ghegheuen, wt v Beecker verheuen  Den dranck der minnen soet  Alle mijn ionck leuen, brengt ghi in sneuen,  Al door den minnen gloet.     Cupido wreet en moortdadich,  Ghy hebt mijn ionck hart doorwont  Met uwen pijlen onghenadich  Schiet ghy my tot alder stont  Lief tot allen daghen, so moet ick clagen,  Mijn druck en teghenspoet [p. 114]    Ick moet nv dragen, dese swaer plaghen  Om v reyn Liefken soet.     Nochtans had ick voor my ghenomen  V dienen tot alder tijt,  Lopende den tijt sou comen  Dat wy souden zijn verblijt  Lief moet ick v deruen, so moet ick steruen  Troost hem die vrede doet  Na Atropos eruen, so moet ick sweruen  Laet ghy my inde noot.     Prince.     Adieu Princes met droeuighen sinnen  V beveel ick mijn ionghe hart  Adieu mijn liefste die ick beminne  Waerom ick moet lijden smart  Gheeft Medecijne, den Dienaer dijne  Verhoort toch mijn propoost  Want t'allen termijne, ic heel verdwijne,  Laet ghy my onghetroost.