Een Amoreus Liedeken.  O Venus ient, een swaer torment,  Een groot allent // lijdt ic by desen  Ghy staet geprent, int hart bekent  Seer excelent // lieffelick van wesen  Wilt ghy my niet, verlaten ziedt, [p. 127]    Alle mijn verdriet // wat my gheschiet  Sal ic achten niet // schoon Lief ghepresen.     Mocht ic van haer, schoon anschijn claer  Al sonder vaer, eens troost verweruen,  Geen gout so swaer, koos ick voor haer,  Een lieflick paer // souden wy steruen  Alle mijn iolijt // in desen tijdt  Mijn Hart verblijt int swerlts crijt,  Tis meer dan tijdt, sal ick troost eruen.  O Maechdelick saet, compt my te baet  Eert valt te laet, helpt wilt druck veriagen  So soet ghelaet // seer delicaet  Doet Venus raet // schout nyders quaet  Ghedult tot my, die in lijden zy  So waer ick bly, dat seg ick vry,  Niemant dan ghy // en derf ick claghen.     Princesse reyn, ghy zijt alleyn,  Lief dien ic meyn // schoon bloem verheuen  Dat weerste greyn // ghy zijt certeyn,  Int swerlts pleyn // wilt my niet begeuen  Gheeft my confoor // een troostelic woort  Lief rechte voort, weest niet verstoort  Mijn beden anhoort // en laet my leuen.