Een nieu Liedt vanden Mey, Op de wijse: alzoot beghint.  Och legdy nv en slaept,  Mijn wtvercoren bloeme //  Och legdy nv en slaept  In uwen eersten droome,  Ontwaeckt, nv soete Lief  Wilt voor v Veynster comen  Staet op Lief, wilt ontfaen  Den Mey met zijnen Bloemen.     Wat ruysschet daer an die Muer,  Dat my mijn ruste berouet  Die my dat scheyden maeckt suer  Die leyde hier op ghedoghet  In mijnen armen so vast  Wy en connens niet ontsluyten,  Mijn Beddeken heeft zijnen last  Plant uwen Mey daer buyten     O suyuerlicke Jeucht,  Wilt nv v ruste laten  Doet op v Vensterken  Ende comt my lief ter spraecken  Al om te vinden troost  So ben ick tot v ghecomen  Staet op Lief wilt ontfaen  Den Mey met zijnen Bloemen.     Al stondy daer tot morghen,  Ick en sal v niet in laten  Mijn Lief leyt hier verborghen  Ghy cont my niet vermaken  Mijn herteken op v niet en past  Noch op gheen spel van Luyten  Mijn Beddeken heeft zijnen last  Plant uwen Mey daer buyten.     Ick sie den lichten dach,  Al onder die Wolcken dringhen  Ick sie de Bloemkens schoon [p. 130]    Al wter aerden springhen  Ick zie die Steernen claer,  Die verlichten inden Throne  Staet op wilt ontfaen  Den Mey met zijnen Bloemen.     Meende dat ick nu slape  Het is anders dat ick dachte,  Die Mey hout my in wake  Daer na mijn Harteken wachte,  Niet als inder aerden wast,  Roosen bloemen, oft ander virtuyten  Mijn beddeken heeft zijnen last  Plant uwen Mey daer buyten.