4 Een nyeu liedeken  1  ALs alle die werelt in vruechden is  So draghe ick int herte rouwe  Ick bidde maria die moeder gods  Ick bidde maria wel schoone ioncfrouwe  Op v so staet mijn trouwen  V beueel ick beyde siele ende lijf  Ick hoope ten sal mi niet berouwen  Want ghi spant die croone int paradijs |     2  Blancke berghe wel duyster koye  Waerom valdy mi so fel  V duysterheyt maect mi confuys  Dat mercke ick aen mi seluen wel  Hier langhe te blijuen en is gheen spel  Wi zijn al ghildekens gheldeloos  Als wi in tsheeren handen zijn  Wi en vinden gheen vrienden altoos     3  This gheleden seuenthien wecken  Tgheuiel op onser vrouwen dach  Mijn heere die Baelyou wilde mi spreken  Op een kerckhof dat ick lach  Mijn ooghen en sagen noyt blijder dach.  Ic waende wel thuyswaert hebben gegaen  Si leyden mi daer op tsgrauen casteel  Si deden mi daer int yser slaen     4  Si leyden mi daer op die pijn banck  si deden mi aen die pijne was groot  si wouden weten wat ic haer seyde  Alsmen mi die coude borne in goot   [fol. 3v]  Och wouter van Cleuen \ ghi neemt mi tleuen  Nochtans en heb ick niet misdaen  die goede heere god wilt v vergheuen  dat ghi mijn hooft doet af slaen     5  Al bi den sauel daer ic op kniele  Daer ick sal storten mijn roode bloet  Ick woude ick waer bi minen lieue  Nochtans heeft si eenen huebschen moet  Haer biwesen is so soet  Hier ende elders ende ouer al  Ick biddende maria die moeder gods  Ic duchte dat swaerdekin snijden sal     6  Nv stelt dat mesken op zijn snede  Ende latet vromelijck innewaert gaen  Ic bidde maria die suyuer beelde  Dat si mijn siele wilt ontfaen  Nochtans en heb ick haer niet misdaen  Anders dan ick haer mijn herteken boot  Dat ic om een schoon vrouwe moet steruen  Ten quam noyt ruyter in meerder noot |