6 Een liedeken vanden slach van Blangijs.  1  ALsmen duysent vierhondert schreef.  Ende neghen en tseuentich iaer  Wat schoonder victorie doen becleef  den vlaminghen dat was waer  Te Blangijs al op dat velt  daer heeft den Leeu zijn clauwen ontdaen |  met machte ende met ghewelt  met foortsen door dronghen  Si riepen alle Flander de leeu  met vlaemschen tonghen     2  Als die Lupaert sach zijn vianden  hi en sorchde voor gheen ghequel  hi thoonde zijn clauwen ende ooc zijn tanden  zijn briesschen ende dat was fel  Sijn ooghen blaecten al waert een vier  doen riepen alle die capiteynen  God hoede ons in dit bestier  Beyde oude metten ionghen  si riepen alle Flander de leeu  met vlaemschen tonghen     3  Die Franchoysen quamen an  seer cloeck ende onuersaecht  ons Prince sprack \ elck si een man  Het moet hier vromelijck zijn gewacht  Elck si gemoet ghelijck een Lupaert  doen sprack die graue van Romont   [fol. 5r]  edel vlamingen thoont uwen aert  die pijckeniers doordronghen  Si riepen alle Flander de leeu  met vlaemschen tonghen     4  Ons edel prynce Maximiliaen  hy beete hem neder te voet.  Ende hi viel ouer zijn knien  biddende Gode met ootmoet  Kinderen dus wil ick dat ghi allen doet  Ende ghi heeren van hooger weerde  met dien maecte hi een cruyce voor hem  Hi custe die aerde  die tranen hem ontspronghen  si riepen alle Flander de leeu  met vlaemschen tonghen     5  Mijn here van Beuer ende menich lantshere  Baenrootsen van machte groot \  behaelden daer prijs ende eere  This recht \ want het was wel noodt  midts hulpe vanden pijckeniers  daer bleuender wel thien duysent doot |  Van tsconincx van Vranckerijc hersiers  Hoe vrolijck dat si songen  Si riepen alle Flander de leeu  met vlaemschen tonghen     6  In Oestmaent den seuensten dach  So is den slach geschiet  Ick bidde maria daer God in lach  Ende hem die alle dinck versoet  Bi zijnder godlijcker cracht  Wi willen hem om victorie bidden  hi heues also wel die macht  met handen ghedronghen  Si riepen alle Flander de leeu  met vlaemschen tonghen