7 Een nyeu liedeken.  1  ADieu schoon bloemken reyn akeleye  Adieu wel rieckende eglentier  Adieu die liefste blijfde ghi  Adieu schoon lieueken ick moet van hier  Adieu ick moet v laten schier   [fol. 5v]  Al is dat mijnder herten een groot gepijn.  Adieu schoon soete lief weest altoos blije  Adieu ic en mach altijs niet bi v zijn     2  Adieu ter werelt die liefste vrouwe  Adieu die schoonste die ic oyt sach  Adieu ic bliue lief inden rouwe  Adieu tis mijnder herten een groot geclach  Adieu schoon lieueken alst wesen mach  Ic sal aenschouwen v blijde aenschijn  Adieu schoon soete lief zijt mi getrouwe \  Want ic en mach niet altijts bi v zijn.     3  Adieu ic moet van hier varen  Adieu tot dat ic weder keeren sal  Adieu God wil v lief wel bewaren  Voor druck \ verdriet oft eenich ongeual  Adieu schoon lief wacht v voor al  Van quade tonghen \ si stroeyen fenijn  Adieu schoon lief schout sulck verswaren  Want ick en mach niet altijts bi v zijn     4  Oorlof neme ic aen v princersse |  Adieu segghe ic v lief tot deser stont  Adieu mijn sinnekens voechdersse  Adieu bruyn oghen ende roode mont  Adieu sneeu witte borstkens ront  Ic en sie ter werelt gheen lieuer dan ghi  Adieu schoon soete lief als ic v messe  Dan sal altoos lief druck bi mi zijn