12 Een oudt liedeken  1  ADieu Antwerpen ghenoechlijc pleyn.  Van v so moet ick scheyden  Ic laet daer in tliefste greyn  God wil mijn boel geleyden     2  Als ic wten lande varen moet  Al binnen den eersten iaer.  Hoe dic verwandelt mijn bloet  Ic sterue een martelaer     3  Als ick vaer ouer die zee.  Van rouwe wil ic steruen  dat doet mijn ionc herte wee.  Ick sal te male bederuen     4  Och venus vrouwe voeret mijnen schilt  Aen v roepe ick ghenade   [fol. 7v]  Helpt mi dat ick mijn boel ghewin  Ende staet mi nv te stade     5  Dat iaer is lanck \ mijn loon is cranck  Mijn hope heb ic verloren  Had ic mijn boel bider hant  Geen goet en core ic daer voren     6  Och lacen si en acht niet meer op mi  des lijdt mijn herte rouwe  Si heeft een ander lieuer dan mi  Si was mi noyt ghetrouwe     7  Die dit liedeken heeft ghedicht  Hi heuet wel ghesongen  Ter eeren van zijn soete lief  God sceyn der nijders tonghen