13 Een oudt liedeken  1  BIstu een crijgher oft bistu een boer  Hoe siedy wt uwer cappen so soer  Wildy een crijschman zijn  So neemt vijfhondert gulden met v  den crijch sal ic v leeren     2  Hansken swoer eenen dieren eet  Al waert mijn vader ende moeder leet  Den crijch en sal ic niet laten  Ic wil gaen ruyten \ rouen stichten brant. |*  Al op des heeren straten     3  Hansken dede zijns selfs raet  Hi vercocht caf ende haueraet  Hi woude al na den crijghe  Corte cleyderen dede hi aen  Al na die ruytersche ghijse     4  Hi clopte voor een schipmans dore  Bistu daer binnen so coemter vore  Ende voert mi ouer twater  Ic ben een rijck boermans sone  Den crijch en can ic niet gelaten     5  Die schipper was een goet gesel  Hy voerde hem ouer twater snel  Dat water was ongeduere  Rijck god waer ic tsoheyme gebleuen  In mijns vaders schuere     6  Doen hansken quam ter haluer zee  Sijn hooft dede hem so wee  den coop was hem berouwen  Rijck god waer ick tsoheyme ghebleuen  Mijn vaders acker woude ick bouwen     7  Doen Hansken ouer dat water quam  Een scram in sinen beck dat hi vernam   [fol. 8r]  Doen wast hem seer berouwen  Hadde ick den ploechsteert metter hant  Mijns vaders acker soude ick wel bouwen