15 Een nyeu liedeken van Claes molenaer  1  CLaes molenaer en zijn minneken  Si saten te samen al inden wijn  Van minnen wast dat si spraken   [fol. 8v]  2  Och heyle wel lieue heyle mijn  die valsche tonghen die wroeghen mi  Ick sorghe si sullen mi dooden     3  Een corte wijle en was daer niet lanck  daer werden boden om claes molenaer gesant  Dat hi voor die heeren soude comen     4  Als claes molenaer voor die heren quam  Die heeren ghinghen in rade staen  Hoe wee was hem te moede     5  Claes molenaer een sake die wi v vraghen  Die bonte cleederen die ghi draghet  Moechdijse wel draghen met eeren.     6  Dese bonte cleyderen die ick draghe  die gaf mi een so schoonen maghet  Si salder mi wel gheuen meere     7  Si gauen hem penninghen in zijn hant  Claes molenaer ghi moet gaen rumen tlant  Bruynswijck moet ghi nv laten     8  Adieu Bruynswijck adieu mijn lant  Adieu mijns herten een vergulden pant |  Ick come daer noch tauont slapen     9  Die valsche tonghe verhoorden dat  si volchden claes molenaer tot op sinen stap  Ende brochten hem tsauonts geuangen.     10  Als hi te Bruynswijck binnen quam  hoe weenden die vrouwen hoe loegen de mans  Hoe wee was hem te moede     11  Mer weet ghi wat claes molenaer sprac  als hi daer voor die heeren tradt  Met sinen lachenden monde     12  Heer schoutert ghi hebt drie dochterkijn  Ghi meynt datse alle drie maechden zijn  Mer lacen si en zijn gheen van allen     13  Die eene dat is mijn minnekin  die ander draecht van mi een kindekijn  Ende bi die derde hebbe ic geslapen     14  Heer schoutert en treckes v niet an  Hi spreect als een verwesen man  Hi en weet niet wat hi clappet     15  Mer weet ghi wat claes molenaer sprac   [fol. 9r]  Als hi al op die leeder tradt  Met sinen verbonden ooghen.     16  In alle Bruyningen en staet niet een huys  Daer en gaet een ionge Claes molenaer wt  Oft een vrou molenarinne     17  Claes molenaer nv laet v clappen staen.  En dede v clappen ghi wares ontgaen  Mer nv moet ghi ymmers hangen.