20 Een liedeken van sint Iacob.  1  DAts wildi vander waerheyt horen singen  Rijc heer god so latet mi volbringen  Die waerheyt die ic v singhen sal.  Van vader ende van sone  Een wonderlijck gheual     2  Die vader sprack tot sinen sone met liste.  Een so goeden beuaert dat hi wiste  Al op den wech sint Iacobs waert |  hi wilde wel versoecken  Den milden onghespaert.     3  Mer doen si aenden wege quamen gaende  Eens waerts huis dat si daer vonden staende  Die vader totten sone sprack  Wi willen ons ghelt verteeren  Ende houden ons ghemack     4  Die weert sprack tot alle sine gasten  Ick hebbe ons bereyt al vanden besten  Eet \ drinct ende weset vro.  Wi willen genoechte hantieren  dat sprack die weert also.     5  Mer doen die goede broeders waren geseten  die dochter vanden huyse quam ghestreken  Costelijck in dier ghewaet  den alder ioncsten broeder  Thoonde si een fier ghelaet.     6  Die dochter sprac tot haren vader bouden  den alder ioncsten broeder wil ic behouden.  Want hi is edel ende fijn   [fol. 11v]  Scheyt hi nv van henen.  So swijcket dat herte mijn     7  Die vader van sinen sone dat verhoorde.  Hi antwoorde met so soeten woorde  Mijn sone met mi ende ick met hem  Wi willen sint Iacob besoecken  Als warachtich pelgrem     8  Tsauonts als die broeders slapen ginghen  Die dochter peynsde om haer valsce dingen  Ende si nam eenen vergulden nap  Met verradenissen  Stacken si in des vaders sack     9  Tsmorgens als die broeders waenden gangen  So quam die valsche weert en dedese vangen  Die weert tot sinen rechter sprac  Dese heeft mi ghestolen  Mijnen vergulden nap     10  Die sone van sinen vader dat verhoorde  Hi antwoorde met so soeten worden  Ic wil voor mijnen vader staen |  Alle sine schulden  Wil ick op mi ontfaen     11  Die heeren daer toe in rade ghinghen  Den sone dat si voor den vader hinghen  Den oudtsten broeder lieten si gaen  Mer hoe dat spel ten eynde quam  Dat sult ghi verstaen     12  Mer doen die vader tot sint Iacob quam  Hi sprac heer sint Iacob wat heb ic misdaen  Ick hebbe verloren mijnen sone  Buyten sinen schulden.  Helpt heere god wten throone.     13  Die vader offerde ende quite sijn beuaert  Ende ginck wederom tsinen lande waert  Daer hi sinen sone quam bi  Och sone sprack hi sone  Dese beuaert schencke ick dy     14  Die sone tot sinen vader sprac wederomme  Die beuaert is v gheworden suer om doene  Verblijt v nv ende weset vro   [fol. 12r]  Sinte Iacob heeft mi geholpen  Maria wt alder noot     15  Die vader verhoorde dat so gheringhe.  Hi ghinck tot dier herberghe binnen  Daer laghen drie hoenderen biden vier  Doen sprack tot hem die valsche waert  Wat dinghe doet ghi hier     16  Ic ben die selue broeder die sint Iacobs ginc  Doemen mijnen sone aender galgen hinck  Mijn sone leeft noch hi en is niet doot  Sint Iacob heeft hem geholpen  Maria wt alder noot     17  Die valsche waert began te grimmen  Waerom liechdy met uwen schimmen  Tis also waer al ouerluyt  Als dese ghebraden hoederen  Vlieghen ter doren wt.     18  Mer eer die waert dat woort wtsprack  Deen hoen na den anderen vanden speet brac  Si vloghen opter straten |  Si vloghen op sinte Dominicus huys.  Daer alle die broeders saten     19  Mer doen die heeren dat verhoorden  Si riepen alle met luyde woorden  Wel op pastoor ende cappellaen  Wi willen met processie  Onder dat gherechte gaen     20  Mer doen si onder dat gerechte quamen  Den ontschuldighen man dat si af namen  Den waert datmen voor hem hinck  Die dochter wert ghedoluen  Si haddet wel verdient     21  Dit liedeken dat wi singhen is seker waer.  Sinte Iacob dede groot miracel daer  Veel broederen tuyghent ooc met dien  Die met haren ooghen  Dit wonder hebben ghesien.