22 Een nyeu liedeken.  1  DAer soude haer een maget vermeyden  Vermeyden so woude si gaen   [fol. 13r]  Roode rooskens wou si pulcken  Die aen der heyden staen     2  Wat vant si in haren wege  Een wel gheboren man  Hi tooch haer wt haer cleeder  Die maget wert so gram     3  Nv gheuet mi mijn cleyder  Och wel gheboren man  Ick schaems my also seere  Dat ic hier naect sal staen.     4  Dats uwe bonte cleyder  En crijchdi waerlijc niet.  V eere suldy hier laten  Eer ghi van mi schiet     5  Sal ic mijn eere hier laten  Och wel gheboren man  Naect was ic gheboren.  Ic en had geen cleyderen an.     6  Hi nam die schoone maget  Al bider witter hant |  Hi leydese onder die linde  Die hi so schoone vant     7  Doen die hubsche ridder  Sijn willecken hadde gedaen.  Hi seyde staet op ioncfrouwe  Ghi moecht wel tuiswaert gaen     8  Waer sal ic henen keren  Waer sal ic henen gaen  Hadt ghi mi maecht gelaten  Ghi hadt veel badt gedaen     9  Hi streec van sinen handen  Van goude een vingherlijn  Hout dat schoon ioncfrouwe.  Daer is die trouwe mijn     10  Wat gaf hy haer te loone  Tot haren nieuwen iaer.  Een kindeken inder wiegen  Met sinen gecrolden hayr     11  Ist dan een knechtken  Een goelijck knapelkijn |  Dat willen wi leeren schieten  Al na die cleyne vogelkijn     12  Ist dan een maechdekijn.  Een goelijc maechdelijn.  Dat willen wi leeren breyden  Van peerlen een cranselijn.     13  Dye dit liet heeft ghedicht.  Dat was een ruyter fijn.  Hi heuet wel gesongen.  Al om die liefste zijn