24 Een nyeu liedeken  1  DEn Mey moet wech na tsomers saysoen.  Den winter is voor ooghen.  Ghi minnaers coemt helpen ende bistant doen  Eer si brandich verdrooghen  Door des winters virtuyt  Gheen cruydeken en spruyt.  Voor bloemkens groeyen biesen  Het doet knyedick sneeuwen | ende vriesen     2  Van sanghe so zijn dye voghelkens ghespent  Ende seer truerlijc ghedoken  Den vorst der velden iuecht doot ende schent  Die sonne staet int beloken  Voor tcoel dauwich rosier  Prijst men dan een goet vier  Den heyrt die valt te cleene  Die velden staen alleene     3  Dye bonte craeyen zijn alleen int lant  Als si wel moghen souden  Deen blaest \ dander clippertant  Ende si zijn blaeu van couden  Ghi liefkens twee en twee.  Moecht door de coude snee  Te velde nemen v ganghen  Ende daer snotuincken vangen.      [fol. 14v]  4  Amoreuselijck zijnde vergadert dan  Tmoet alle vruecht passeren  Met nyet meer volckx dan wijf ende man  Moecht ghi dan maioleren  Ende na des winters aert  Maerts bier of wagebaert  Met een poeyerken bestroeyen  verfraeyt siel ende lijf int poyen     5  Een eycken rozijnken dat hooge laeyt  Tgeeft een natuerlijc luesen  Al ist dat buyten haghelt reghent oft waeyt  dat doet de kaeckens blosen  Al is die winter stranck  Haer nachten die zijn lanck  Om vrolijc te zijn ter tijcke.  Het is een heymelijc rijcke |     6  Princelijcke vroukens seer aerdich geplucht  Coemt met v lief ter bane  Die sterrekens staen en quicken aen die lucht  Seer claer so blict die mane  Sinct \ clinct \ ioct ende speelt  In dien dat v verueelt  Comdy v niet verwermen  Vliecht in ws liefkens armen.