26  1  DEn winter comt aen \ den mey is wt  die bloemkens en staen niet meer Int groene  die nachten zijn lanc door des winters vertuyt  Nv lust mi wel wat nieus te doene  Mijn ionghe iuecht is nv in saysoene  Mijn man en is niet wel mijn vrient  ey out grisaert \ al sliept ghi totter noene  Ghi en hebt niet dat mi dient     2  Het was mi van te voren gheseyt  Dat ghi waert van slutsaerts bende |  V spel mi oock niet en ghereyt  int beghinsel noch int eynde  Waer ick mi keere oft wende  Mijn man en is niet wel mijn vrient  ey out grijsaert dat ic v oeyt kende  Want ghi en hebt niet dat mi dient.     3  Vermaledijt so moeten si zijn  die dat houwelijc van hem voortbrochte  Het schoon coluer \ den reynen maechdom mijn  dat die griecke aen mi verlochte  Mi en rocx hoe ick van hem gerochte  Mijn man en is niet wel mijn vrient  ey out grysaert dat vlees ic te dier cochte  Want ghi en hebt niet dat mi dient     4  en weent niet meer mijn soete lief  Ick hebbe genoech voor v behagen  Siluer ende gout van als v gherief  daer toe bereyt v leue daghen  Van mi en hebdy dan niet te claghen.  Ghi segt ic en ben niet wel v vrient   [fol. 15v]  ey out grisaert \ dat beenken moetty knagen.  Want ghi en hebt niet dat mi dient     5  Had ic pampier schoon parkement  Penne ende inct \ ick schreue daer inne  Aen die liefste prince bekent  Dat hi soude comen tot zijn vriendinne  Dien ic met goeder herten beminne  Want mijn man en is niet wel mijn vrient.  ey out grisaert al soudi daer om ontsinnen.  Ic heb een ander liefken die mi dient.