31 Een nyeu liedeken  1  DAt meysken opter laden lach  Si weende also seere  Hadde ick nv eenen knaep  Die mi dat luytken sloech   [fol. 18r]  ende ic een kindeken van hem droech     2  Dat verhoorde een ionghe knaep  een knaep die was stout  Hi dede een veelken maken  Van siluer ende van roode gout  Ay mi lieue meysken ghi valt mi seer bout     3  Doen dat veelken ghemaket was  Hi ghinck voor zijns liefs dore  Shoon lief zijt ghi daer binnen  daer binnen \ so coemt hier vore  Ay mi lieue meysken hoe beual ic dy.     4  Ghi beual mi wter maten wel  Met dy vaer ick van hen  Ouer die groene heyde  Vader ende moeder te leyde  Ay mi lieue lantsknecht ick ben bereyt     5  Als si op der heyden quam  die heyde was lanck ende groot  Had ick nv ros ende waghen  die mi weynich droech |  Ay mi lieue lantsknecht ick ben so moede     6  Ros ende waghen en heb ic niet  Maer eenen bedelaers sack  Mach ick v daer mede helpen  Ick hanghen v aenden hack.  Ay my lieue meysken hoe beualt v dat     7  Ick en ben gheen bedelersse  Noch oock gheen bedelaers kint  Ick ben eens coopmans dochter  Te Couelens op den rijn  Ay lieue lantsknecht ic vaer van dy     8  Sidy eens borghers dochter  Te Couelens al op den rijn  So ben ick eens visschers sone  Te Walckenborch al op die merct  Ay mi lieue meysken ho beual ic dy     9  Die ons dit goede liedeken sanc  Ende wel ghesonghen had  Hi heuet wel gesonghen  God gheue hem een goet iaer   [fol. 18v]  Een schoon vrou had hi met hem gaen.