33 Een amoreus liedeken  1  DIn eygen certeyn reyn vroulic saet  Blijf ic \ ghi zijt die gene daer al aen staet  Hert \ sin \ moet v aencleuen  Ghi hebt int herte den hoochsten graet  Ghi zijt die fonteyne diet al af dwaet  Ghepeyns mijn suchten ende beuen  Ghi zijt bouen alle bloemkens soet  Bouen roosen root  Dus blijue ick dijn eyghen tot in mijn doot     2  Medea Iason noyt so seer en versinde  Paris Helenam noyt so seer en beminde  Bouen alle sidy ghepresen  Ic moet verdwijnen als stof voor den winde  Ist dat ic gheen troost aen v en vinde  Reyn bloeme wtghelesen  Noyt Venus geschut mi so seer doorscoot |  Ick segt v bloot.  dus blijue ic dijn eyghen tot in mijn doot     3  Naest v in swerelts begrijpen gheen  die therte beswaert dan ghi alleen  Schoon vrolijcke figuere.  en weest doch niet ghelijck den steen  Mer helpt mi lief wt droefheyts ween  Mijn herte wt allen getruere  So mach ic leuen in vruechden groot  Sonder wederstoot  Dus blijue ic dijn eyghen tot in mijn doot     4  Al hebbe ick geheel o lieflijc bloet  Mijn herte ghestelt in v behoet  Laet mi gheen druck verwinnen  V minlijc aensicht v woordekens soet  Die brenghen mi inder minnen gloet  Si doen mi dit beginnen  Ghi zijt mijn voetsel ter wterster noot  Bouen wijn ende broot  Dus blijue ick dijn eyghen tot in mijn doot