37 Een nyeu liedeken  1  EEn oude man sprack een meysken an  Schoon lief wildi beteren mijn verdriet  Neen ic seydese lieue Ian  Van uwen biere en dorst mi niet.  Tis beter dat ghi van mi vliet   [fol. 21r]  Ghi doet doch al verloren pijn  Mijn boelken moet een ionck man zijn     2  Schoon lief ick soude mi geerne paren  Waert v beliefte nv ter tijt  Spreect een oude quene van tseuentich iaren.  Oudt ende verrompelt also ghi zijt  Aen v en is doch gheen profijt  Ghi en tapt niet dan verschaelden wijn  Mijn boelken moet een ionck man zijn     3  O Waerde suuer iuecht  Herte ende sin hanget al aen dy  Stelt v te vreden oft ghi moecht  Wi en dienen niet te samen ick ende ghy  Oudt ende versleten dunct ghy my  Wat soudt ghi schrijuen in mijn francijn  Mijn boelken moet een ionck man zijn     4  Shoon lief wilt doch doen mijn auijs  So sal ic v maken van goede rijc  Een ionc man staet badt in mijnen prijs  Ghelijc soect altijt zijn ghelijck |  Wat soudt ghi doeghen op eenen tijt  Dan droncken drincken als een swijn  Mijn boelken moet een ionck man zijn     5  Ic mach wel claghen mijn verdriet  Ic minne ende en worde niet ghemint  Nv swijghet seyt si luerefaes  Vrijdt elders daer ghi troost ghewint  Ic hebbe bemint een ionghelinck  Mijn herte verblijt in zijn aenschijn  Mijn boelken moet een ionck man zijn