39 Een nyeu liedeken.  1  EEn ionck meysken reyn van seden  Hadde mi tot haren bedde gedaecht  Ende des was ick so wel te vreden  Het dochte mi zijn een suyuer maecht  Dies was ick van herten bouwe  Si seyde zijt wellecom lief seer weert  Na v so heeft mijn herteken begheert  Dat neme ick op mijn trouwe     2  Als wij te samen opt beddeken waren.  Met vruechden dat wi songhen  Wij lieten clincken der vruechden snaren.  In spijt der nijders tonghen  Wi waren al te samen so wel te pas  Dat dede die schoone suyuer iuecht |  Des so was mijn herteken soo verhuecht  Mi docht dat ick daer rooskens las     3  Daer laghen wi twee al totten dach  Van vruechden also droncken  Als ick die schoone bloeme aensach  Mijn herte dat wilde ontfoncken  Dat dede dat vrouken schoone  Si was so vriendelijc van aenschijne  Al in mijn herteken spant si die croone     4  Als lief bi lief te samen rust  Ende in die armkens luyken  Si boeten der natueren lust  Met vruechden die si ghebruycken  Sulck ist natuerlijck wesen  Een amoreus ist int beghinnen  Alsmen zijn liefken mach ghewinnen  Het is een vruecht ghepresen     5  Als twee ghelieuekens te samen zijn  Ghenoechte dat si hantieren  Si vergheten alle druck ende pijn   [fol. 22v]  Als si te samen roseren  dat doet die amoreusheyt groot  Die menighe is van dier natuere  die nacht en dunct hem niet een vre  Als hi mach rusten in zijns liefs schoot     6  Ick bidde v minnaers ende rosiers  Die metter minne zijt beladet  Si maken som so veel bestiers  dat si const versmaden  dies so heeft die menighe toren  Ick segt v oock te sulcker tijt  die onconstighe heeft sulcken nijt  daer bi so gaet die conste verloren     7  Dese nijders zijn argher dan fenijn  Ende van sulcker natueren  Als si vruecht sien dat dunct hem pijn  Al waert van haer ghebueren  Si en waren noyt gaerne beuonden  een clappaert is van sulcker sede  Hi maect onurede ter menigher stede |  Waer dat hi can vermonden     8  Die dit liedeken heeft ghemaect  Hi custese aen haer wanghen  Bi zijn liefken lach hi moedernaect.  Met vruechden was hi beuanghen  Van Dermonde is hi geboren  Hi sidt so gaerne op die banck  Als hi mach drincken goeden dranck  Schoon vroukens heeft hi nv wtuercoren