40 Een amoreus liedeken.  1  EEn ionghe maecht \ heeft mi gedacht  Te comen in haer camerkijn  Stout onuersaecht \ heb ict gewaecht  Ick was bespiet van nijders fenijn  Sal ick noch moeten in drucke zijn.  Want si mi liefde heeft bewesen  mocht si gebueren mi \ mocht si gebueren mi.  en so waer ick vrij  Van alle mijnen druck ghenesen     2  Haer aenschijn claer \ heeft mi voorwaer   [fol. 23r]  Mijn oochskens alte seer verblent  Dat ic haer \ in drucke ende vaer  Dat is den hoochsten heere bekent  Had ic mijn lieueken hier present  So waer mijn vruecht verresen.  Mocht si gebueren mi \ mocht si gebueren mi  Ende so waer ic vrij.  Van alle minen druck ghenesen     3  En al om mijn lief \ lijde ic miskiet.  Want icse selden spreken mach  Mer als een dief \ lijde ic miskief  Mocht icse versoecken nacht ende dach  Dat wildi hooren mijn geclach.  Van mijnen lieueken ghepresen  mocht si gebueren mi \ mocht si gebueren mi  Ende so waer ic vrij  Van alle minen druc ghenesen     4  Princersselijc aensien \ moet ic haer bien  Bouen al die leuen int aertsche dal  Al moet ic van haer vlien \ door nijders bespien |  Ic hoopt niet langhe dueren en sal  Want God die heere is bouen al  So wil ic swijghen met desen  mocht si gebueren mi \ mocht si gebueren mi  Ende so waer ic vrij  Van alle minen druc ghenesen  Mint daer ghi trouwe vint