41 Een amoreus liedeken  1  Een lodderlijc vrouken seer amoreus  Si was van wesen so huebsch ende fijn.  Met een gheselleken seer coragieus  Ghinc si te biere ende inden wijn  Si schoncken \ si droncken \ si maecten iolijt.  Al lachende wert de ruyter zijn geldeken quijt     2  Si zijn in liefden wel also vast  Si en connen van malcanderen niet gescheen  Wanner hise aen haer borstkens tast  Ten mach dat vrouken niet verleen  Si songhen \ si spronghen \ si maecten iolijt.  Al lachende wert den ruyter zijn. etcetera.   [fol. 23v]  3  Dus zijnse met hen beyden slapen ghegaen  Si speelden te samen een soet accoort  Ende ghinghen in Venus fonteynen dwaen  Ghelijck sulcke ghelieuekens toebehoort  Vrou Venus spel en wert daer niet benijt.  Al lachende wert den ruyter. etcetera.     4  Tsmorghens vroech alst was schoon dach  Hoe vriendelijc dat hi op dat vrouken loech  Met lodderliken ooghen dat si hem aensach  Si sleepten te samen vrou Venus ploech.  Si schoncken \ si droncken \ si maecten iolijt.  Al lachende wert den ruyter. etcetera.     5  Dat vrouken docht eenen loosen toer  Wanneer zijn gheldeken was al verschoyt  en si was dubbelder dan een snoer  Het was verteert ende al verpoyt  Met singhen \ met springen \ met groot iolijt  Maken si menich ruyter zijn geldeken quijt     6  Princersse lief hoe come ic in dit verwaet.  Mer dat ick van v dus scheyden moet |  Ic worde verworpen wt minen staet  daer wi plegen te sitten in vruechden soet  ende schoncken ende droncken ende maecten iolijt  Al lachende wert den ruyter. etcetera