46 Een nyeu liedeken.  1  FOrtuyne wilt v keeren  En valt mi niet so suer  Ende ick blijue al int verseeren  In lijden swaer doleur  Mijns liefs regeur  Dat valt mi nv so snel  Verdraghen moet ick leeren  Door dese nijders opstel     2  Rijck god wie sal ick claghen   [fol. 27r]  Meer dan die liefste mijn  Nv ende tot allen daghen  Sal ick v ghetrouwe zijn  Stout ende fijn  Spijt die nijders ouer al  Sal ic v goede ionste dragen.  Tot dat ick steruen sal     3  Wanneer ic op haer dincke  So verandert alle mijn bloet  Ick soude gaerne schincken  Mijn lijf ende alle mijn goet  In v behoet.  Wilt danckelijc ontfaen  Laet in v herte dencken  Ick en sal v niet ontgaen     4  Adieu schoon roose bloeme  Scheyden dat moet nv zijn  Totdat ick weder come  Die alder liefste mijn  Tot dat ick weder keere. |  Adieu lief gracieus  Adieu mijn lief mijn eere  Die waertste coragieus     5  Schoon lief zijt mi getrouwe.  Ick en gheere anders nyet  Troost mi of ick verflouwe  Als ghi mi in lijden siet  Hoort na mijn bediet.  Als ic v niet spreken en mach  Doet dat ick v aenschouwe  Tot op een ander dach