47 Een nyeu liedeken.  1  FOrtuyne heeft mi verbeten  In lijden dus gheschent  Als mijn lief mach weten  Si hout mi in torment.  wantrouwe ghi doet mi quelen  Daer ic mi toe verliet. |  Met mi hout si haer spelen  Op mi en achtse niet  Haer aenschijn claer  Tscheyden gaet mi so swaer  Ay lacen lief ay my.  Scheyden moet ick van dy     2  Dat ick van haer nv moet scheyden  Ic blijue in drucke versmacht.  Schoon lief wilt my troost gheuen.  Het is wel in v macht  O Cupido god van minnen  Laet ghi mi int verdriet  Ick duchte ick sal ontsinnen  So ghi voor ooghen siet  Haer aenschijn claer. etcetera.     3  Mocht icse noch aenscouwen  Haer schoon bruyn oochskens claer.   [fol. 27v]  Die bloeme bouen alle vrouwen  Haer wesen is eerbaer  Men costse mi niet ontprijsen  Nv noch tot gheender stont  Mochte haer minne noch rijsen  So waer ick al ghesont  Haer aenschijn claer. etcetera.     4  Mer lacen si slaet mi nv swijcke  Die suyuer maghet reyn  Ick en ben niet haers ghelijcke  Dat sie ick wel certeyn  O radt van auontueren  Gaet altoos uwen ganck  Mach mi gheenen troost ghebueren  Dat lijden wert mi veel te stranck  Haer aenschijn claer. etcetera.     5  Fortuyne sal noch faelgieren  Ende dat in corten termijn  Ick sal noch vruecht hantieren  In spijt van alle dese nijders fenijn |  Al ligghe ick onder die voeten  Ick sal noch rijsen wel  Ende mijnen druck noch boeten  Ondanc alle die nijders fel  Haer aenschijn claer. etcetera.     6  Princersse reyn ghepresen  Oorlof als nv ter tijt  Als ick bi v alleyne mach wesen  So ben ick al verblijt  Dat ic van v nv moet scheyden  In also corten termijn  Oorlof tusschen ons beyden  Adieu die liefste mijn  Haer aenschijn claer.  Het scheyden gaet mi so naer  Ay lacen lief ay my  Scheyden moet ic van dy