[fol. 28v] 49 Een nyeu liedeken.  1  GHepeys \ ghepeys vol van enuijen.  dwelc oorspronc is dat menich truert  Hoe queldi mi nv met fantasijen  Mi dunct dat mi mijn herte schuert  God gheue haer vruech wient ghebuert.  Al doetse mi dese quale  Haer wesen fier heeft mi becuert.  Midts tcoluer van corale  Rast v ghi nachtegale  Vliecht wt dat wilde wout  Gaet segt haer dit altemael  Ende groetse mi menich fout.     2  Ick peynse om Veuus discipline  die mi so late sandt dese sucht  Hoe stadigher liefde \ hoe merder pijne  Hoe vuylder wonde \ hoe erger ducht  Een tijtlick fruyt neemt saen de vlucht  Ghepluct ten greonen dale.  Men prijst best een volwassen vrucht |  Ghelijc een cuyssche smale.  Rast v. etc     3  Beloften veel is si mi schuldich  Mer onder al een excellent  daer na verlanghet mi menichfuldich  Wat is \ tis haer bekent  Wat ick bedrijue in mijn conuent  dit altoos ic verhale  Vonde ic mi leech als si is absent  Van haer ic niet en fale     4  Ghepeyns hoe soudy niet gehingen.  Ic moet eylaes tis groote noot  dat doen thien duysent vreemde dinghen.  Ons beyden ghebuert \ si weet al bloot  Wi drincken vruechten droefheyt groot  Beyde wt fortuynen schale  door tswaer ghepeyns van dit exploot  Therte sterft al waert van stale.  Rast v. etc     5  Mochtmen met cruyde oft medecijne  Ghenesen mijnder liefden brant  Ic waer ghenesen vander pijne   [fol. 29r]  Mer neent hulpt sulck onderstant  Dus gatet eylaes aen minen cant  Door tlast der minnen strale  Ic vloecke den af god die mi bant  Met Venus biter dwale  Rast.     6  Princesse ic swijghe veel om beter  Als ic peynse om ons oude spel.  Ic en vant ter werelt noeyt secreter  Dies vreese ic twint dese nijders fel  Vrou Venus dect haer kinderkens wel  Draghen zijs huesche tale \  Tsal al wel zijn door mijn beuel  Schoon lief dat is tprincepale  Rast v. etc