51 Een oudt liedeken  1  GHeldeloos ghi doet mi pijn.  Al mijn vruecht doet ghi verdroogen  Ick soude so gaerne vrolijc zijn  Woudt mijnen buydel ghedooghen     2  Het was mi van te voren gheseyt.  Ick en wouder niet na hooren  Hadde ick een pennincxken wech gheleyt.  Dat mochte ick nv oorboren     3  Ick plach te sitten op die bierbanck  Waer is den tijt gheuaren   [fol. 30r]  Al buyten sweechs leyt mijnen ganc  Niet hebben doet veel sparen     4  Doen ic goet geldeken had in mijn tas  Doen ghinc ic metten goey ghesellen  Mer nv mijn ghelt is al verteert  Nv moet ic boomkens tellen     5  Wanneer ic in die tauerne come  Ter tafelen ben ic haest geseten  Dan make ic mi van achter wt  Dat die goey ghesellekens niet en weten.     6  Pot ende kanne het is al verteert  Waer sal icx meer gaen halen  Die vrouwe die mi te borghen plach  die moet ic nv wel betalen     7  Eten ende drincken is mijn motijf.  Te sitten metten vollen balghe  Als ict ghebrenghen can int lijf  Voor die dore en staet gheen galghe     8  Het was mi van te voren gheseyt  Ic salder noch langhe op dincken |  Als ic mijn buycxken hebbe gheuult  So gae ic te Walem duncken