52 Een nyeu liedeken.  1  GHi ruyters gesellen van auontueren  die gaerne sitten op den wijnbanc  Wi ligghen ghesloten tusschen mueren  Van fortuynen zijn wij so cranc  Een verrader ons daer toe dwanc  Met schoone woorden hebben si ons geuaen  Den tijt sal keeren eer yet lanc  dat wi te Brugghe op strate sullen gaen     2  Quade tonghen soudent gaerne keeren  dat wi souden laten Vlaenderen soet  Men sal altoos goede ghildekens eeren  Ende maken altijt eenen moet  Mer die besmet is van Iudas bloet  Die schieten altijt haer fenijn  Elc wachter hem voor siet wat hi doet  This so quaet gheuanghen te zijn     3  Al ligghen wi nv in dit perket   [fol. 30v]  Wi sullender noch eens wt raken  Wi zijn gheuanghen al teghen die wet  Dat deden ons des heeren knapen  Vijf woluen quamen daer om twee schapen.  Si en hadden daer op niet gedacht  Si souden haren broeder ontschaken  Al om te betalen haer pacht     4  Nv bidde ick alle ruyters fijn  Dat si hem willen wachten  Voor quade tonghen gheen argher fenijn  Si schieten bi daghe ende ooc bi nachte  Si hebben so menigherhande gedachte  Eer si strijcken haren staert.  Ghi ruyters ghesellen hoort mijn clachte.  Want si is wel hoorens waert     5  Die dit liedeken heef gestelt  Van Mechelen is hi gheboren  In sinen buydel en hout hi gheen ghelt  Hi gheuet gaerne al te voren  Schoone vrouwen heeft hi wtuercoren |  Die staen so vaste int herte claer  Schenct den wijn en laet niet trueren  Het coemt alleleens ouer hondert iaer