53 Een amoreus liedeken  1  GHestadighe minne draghe ic altijt  Dies lijde mijn herte pijn  Mocht ic noch zijn van haer verblijt  Hoe vrolijc soude ick zijn  Tot haer soude ick mi keeren  Gheen ander lief begheeren  Want si is die alder liefste mijn     2  Ist niet een druckelijc leuen  Te deruen die ick minne  Ick hadder mi toe begheuen  Ic en was niet dan een kint  Ic dedet in corter vren  dat ick langhe moet besueren  Eylaes ick was so seer verblint     3  Doen ick laeste met ooghen aensach  die mijn herteken heeft beuaen   [fol. 31r]  Doen was ic vrolijc nacht ende dach  Ende nv ist al ghedaen  Van haer ben ic gescheyden  Alle druck moet ic verbeyden  Ick mach wel truerich gaen     4  Mijn schip is mi ontdreuen  Minen ancker en leit niet vast  Mijn lief heeft mi begeuen  Recht als een onwaert gast  Eylaes this buyten minen. schulden.  Nochtans moet ic mi verdulden  Al in mijn hert lijde ic verdriet     5  Die dit liet heeft ghestelt  Dat was een ruyter van droefheyt  Sijn lief is hem onthelt  This haest genoech gheseyt  eylaes van haer is hi gesceiden  Allen druck moet hi verbeyden.  Is hi niet genoech ghequelt |