56 Op die selue wijse.  1  HOe luyde riep die siel tot god van binnen  Och here almachtich vader goet  Wat sal ick gaen beghinnen  Dat lichaem beswaert dat herte mijn  Och heere wilt mijns genadich zijn  Dat vlees wilt mi verwinnen     2  Als dlichaem die siel dus hoorde clagen  So sprackt o edel siele mijn  Waerom wildi v versaghen  Schouwet des boosen viants raet  Ende laet die valsche werelt quaet   [fol. 33v]  Ghi sult gode wel behaghen     3  Die siele sprac \ ic sout gaerne volbrengen  Mer ghi o valsche lichaem mijn  En willes niet gehengen  Natuere ende ghi \ ghi doet mi pijn  Nochtans so moet gestreden zijn  Ick en can v niet bedwinghen     4  Dat lichaem sprac \ o siele die heere der heeren  Heeft v ghegeuen sin ende list  Om dat ghi mi soudt leeren  God heeft v ghegeuen reden ende sin.  Om mi die tot sonden geneghen ben  Dat ghi mi soudt regeren     5  Die siele sprac \ mocht mi dat ghebueren  dat ic mocht steruen ghelijck als ghi  So soude ic leuen sonder trueren  Mer als ic voor doordeel gods sal staen.  Ende na wercken loon ontfaen  So moet ict al besueren     6  Dlichaem sprac \ als ghi dat weet te voren. |  So wie hem seluen al willens wont  Oft tredt in eenen doren  Wie sal hem beclaghen dat vraghe ic dy  Ghi moet oock sorghen voor mi  Oft wi blijuen beyde verloren     7  Die siele sprac \ lichaem ghi moet wel sorgen  Want als coemt die bitter doot  Wie sal ons dan verborghen  Dus moet ghi gaen sorghen het is noot  Dat ghi niet en verliest die blischap groot  Ghi en hebt doch gheenen morghen.     8  Dlichaem sprac \ moet ic ooc steruen leeren  Ende ic en weet doch gheenen tijt  Waer toe sal ic mi keeren  Die werelt thoont mi vrolicheyt  Natuere die is daer toe bereyt  Hoe sal icse moghen verheeren.     9  Die siele sprac \ o lichaem snoo van weerden  Waer op so verlaet ghi v  Wat wildy hier aenueerden.   [fol. 34r]  Hoe dorfdy bedrijuen eenich solaes  Arm stinckende vleesch der wormen aes  Ghi moet doch inder aerden     10  Dlichaem sprack \ moet ic inder aerden tijden  Och here god van hemelrijc.  Hoe mach ick mi verblijden  Dat ick ben inder sonden staet.  Mi rout so seere mijn leuen quaet  Ic wil mi leeren lijden.     11  Die siele sprac \ wildi v tot duechden geuen  So sullen wi dan ick ende ghi  Bi Iesum zijn verheuen  daer blijschap sal wesen ymmermeer  Ende zijn verlost wt den eewighen seer  daermen eewelijc sal blijuen     12  Dlichaem sprac \ ontfermt god onser beyden  Mi ende die edel siele mijn  Ende wilt ons doch geleyden \  Wilt doch bewaren die edel siele van my.  Maect dat ons leuen v behaechlijck si.  Wanneer wi moeten scheyden