63 Een oudt liedeken  1  HEt was een rijck boermans sone  Ende hi voer spelen opter straten  daer vant hi so huebschen maechdeken  Hi badt haer om eens bi te slapen     2  Hi badt haer om een slapen bi   [fol. 37v]  Te rusten op haer sponde  Ic en sal van al die lieue langhe nacht  Mijn handeken bi v niet steken onder     3  Bidt ghi mi om een slapen bi  Dat gheeft mi ia groot wonder  Nv doet wt v hosen ende v schoen  Ende coemt hier bi mi onder     4  Doen hi bi dat meysken onder quam.  die ruyter viel in vake  Al had die nacht een iaer lanck gheweest  Hi hadde hem altemael doorslapen     5  Tsnachts ontrent der middernacht  Dat meysken keerde haer omme  dat dede si al om haer soete lief  Oft hi daer af yet hadde ontspronghen     6  Tsmorghens vroech doent was schoondach  Dat meysken lach in waken  Wel op seyt si wel lieue kinckelboer  Hier is te lanck gheslapen     7  Tsmorgens vroech alst was schoon dach |  Die boer woude thuyswaert ganghen  Dat meysken maecte hem eenen haueren bry  In eene verroeste panne     8  Tsmorgens vroech alst was schoon dach  Ende hi thuys quam gheganghen  Nv segt mi segt mi lieue sone mijn  En hoe is v den strijt verganghen     9  Och moeder seyt hi moeder mijn  This mi so leyde verganghen  Dat meysken maecte mi eenen haueren bry  In een verroeste panne     10  Sone seyde si sone mijn.  Dat is v alte groote schande.  Ghi moecht wel alle dese somer lanck  Gaen wachten alle die gansen vanden lande     11  Och moeder sprac hi moeder mijn  dat waer mi alte grooten schande  Ic hadde veel lieuer dat hubsche meisken fijn  Dan alle die gansen vanden lande