70 Een oudt liedeken.  1  HEt gheuiel op eenen donderdach.  Ontrent der haluer weken  doen quam mijn heer die cappelaen  Die Borchstrate in ghestreken     2  Doen hi al door dat doorken quam  die vrouwe sadt biden viere |  Lieue vrouwe waer is v man  Laet ons goede chiere maken     3  Mijn man is van huys ghegaen  Gheuaren metten schepe  Ic duchte hi weder comen sal  den hals die moet hi breken     4  Den dach die quam ten auont waert  die man quam thuys gheganghen  Ons heere god vanden hemel weet  Hoe hi daer was ontfanghen     5  Hi nam dat rincxken in zijn hant  Hi clopte al met sinne  Staet op Lisken mijn getrouwe wijf  Staet op ende laet mi inne     6  Doen hi al inder cameren quam  dat bedde was daer ghebroken  Die eyerkens stonden daer ghedoopt  die doeierkens waren wt ghesopen.     7  Hi nam dat broexken in zijn hant.  Hi taste al na die clincke   [fol. 42r]  Daer vant hi Willeken zijn broeder zijn  Och Willeken wi hier alleyne zijn     8  Lieue man wat hebdy ghemaect  Wat hebt ghi nv ghebrouwen  Ghi hebt die arme pape beschaemt  Het sal v langhe berouwen     9  Die man die soude te bedde gaen  dat wijf en wouts niet ghedooghen  Si stiet hem vanden trappen af  Daer viel hi twee blau ooghen     10  Hi nam daer eenen groenen stock  Hi smeet haren rugghe ontstucken  Nv segghet mijn heere den cappelaen  dat hi v dat af lecke     11  Die dit liedeken eerstweef sanck.  dat was een ruyters gheselle  Hi drinct veel lieuer den rijnschen wijn  Dan twater wter schelde