76 Een nyeu liedeken.  1  HIer zijn drie lichte geladen  Wi brenghen v den mey  Den mey met sinen bladen  Neemt danckelic ons intrey.  Ter eeren van scoone vrouwen.  Brengen wi des meys engien  so lustelijck gehouwen  Int dal van melodien  Wech nijders prien  Ghi en moecht ghesien  Gheen duecht geschien.  Wilt van ons vlien  Quade tongen die ons benien   [fol. 44v]  2  Op een schoon fonteyne  Quamen wi huyden vroech  Cypresse maioleyne.  Ende ander cruyts genoech  Om hooren wi neder saten  der voghelen soeten sanck.  Met diens dat wi vergaten  dat ons die winter dwanc.  Reyn armkens blanck.  Naer uwen danck  Is ons verlanck.  Dat bischop stranck  Brocht ons in desen ganck     3  Daer liepen veel wilde dieren  Al in die groene vrucht  die vogels veel van manieren  Die songhen vander lucht  Mochten wi daer nv gecrigen  die ons so wel aenstaet  Wi souden stille swijghen |  In duechden sonder quaet  Reyn vroulijck saet  doet onsen raet  Met liefden gaet  Die hem wel waet  In hem en is geen misdaet     4  Al hadden wi v daer buyten  Al in dat groene wout  daer alle die vogels ruyten  Ghi waert in ons behoet.  Wi souden veel lieuer steruen  dan v doen eenich leet  Laet ons eens troost verweruen  Ons trouwe is v bereet  Noeyt liefde en sneet  In ons so heet  Also god wel weet  Ons naeste cleet  Blijf in v in ons secreet     5  God hoede ons van schade |  Door wien datmen dit doet  Maria vol ghenaden  die suyuer bloeme soet  die wil ons Kaerle bewaren.  Dat princelijc ghenoot  Ende noch in duechden sparen  Sijn vrienden cleyn ende groot  Delft minyoot  In haren schoot  Voor wederstoot  dat het volck deuoot  Mach winnen salich broot.     6  Ter eeren van deser stede.  Heeren ende wet eerbaer.  Ende al het ghemeynte mede  So doen wi dit voorwaer  rosiers ende vruechdeners coene  Ghi iongers van herten fijn.  Trect om den mey int groene  Vertoont v blijde aenschijn   [fol. 45r]  Ons werck is dijn  Sonder fenijn  In dit termijn  Schenct in den wijn  Ende laet ons vrolijc sijn