77 Een amoreus liedeken.  1  HEt vlooch een so cleynen wilt vogelken  Tot mijns liefs venster in  Staet op mijn alder liefste  Staet op ende laet mi in  Ic hebbe te nacht geuloghen  Al door die wille dijn     2  Hebdi te nacht gheulogen.  Al door die wille van mi  So coemt ter haluer middernacht  Ic wil v laten in  Ic wil v decken warme  Met mijnen snee witten arme     3  Ende dat verhoorde een | wachter goet  Op hooger tinnen lach  ic waen ghi waert een huebsce  Een huebsce machdelijn  Ende si had in ghelaten  die lantsknecht vander straten.     4  Och willet wachter swigen  Laet dat verholen zijn  So wil ic v schincken  Van gouden een vingherlijn  daer toe een schoon cranselijn.  Och here god vanden hemel  Hoe is den dach so lanck     5  Den dach en is so lange niet  Het wert wel wederom nacht  mi heeft so huebscen maechdelijn  Een bislapen toegesacht  Och mocht ic bi haer slapen  Mijn trueren soude ic laten  Ende hebben eenen vrijen moet. |  Om alle lantsknechten wille  Verteere ic mijn gelt mijn goet     6  Mer dat ghi by mi slapen sout  dat is die wille van mi  Och willet lansknecht swigen  Ghi sult die liefste zijn  daer op een so huebscen moet  Om alle lantsknechten wille.  Verteer ic mijn gelt ende goet     7  Die ons dit liedeken eerst werf sanck  So wel gesongen heeft  dat heeft ghedaen een vrome lantsknecht  God geue hem een vrolic iaer  Hi heuet so wel ghesongen.  God sceynde alle niders tongen  Hi heuet eenen vrijen moet  Om alle lantsknechten wille  Verteer ic mijn gelt ende goet