86 Een amoreus liedeken.   [fol. 50r]  1  IC had een alder liefste  Die ic met ogen aensach  om haer quam ic gereden  Vanden auont al totten dach.  Om haer quam ic gereden.  Vanden auont al totter tijt  Och woude si mi in laten  dat reyn trou salich wijf.     2  Hi clopte also lijselijck  Met sinen hamere  Dat al die plancxkens sprongen \  van der camere  Staet op mijn alderliefste.  Staet op ende laet mi in  Ic swere v bi mijnder trouwen  Ick waer so geerne bi di     3  Dat meysken schoot aen een. hemdeken wit  Ter dueren dat si ghinck  In haren blancken armen. |  dat si haer liefken omuinck  Nv weset wellecom  Mijn lief mijns herten bruyt  Wi willen genoechte hanteren.  Ende maken gheen gheluyt     4  Dat verhoorde die wachter.  Op hoogher tinnen  Hier is een schoon frisch ion iongelinc \  gecomen inne  Wat sal hi mi gheuen \  twee hooskens ende een paer schoen  Oft ic sal van hem clappen  Wat si opter cameren doen     5  Och swiget wachter stille.  Laet dat verholen zijn  Ick sal v laten maken  Van goude een vingherlijn  Met eenen siden snoer.  Dat meysken haer hayr op bant  Haer mantelken liet si glijden |  haer eere en duerde niet lanc     6  Hi dede eenen bode seynden  daer hi den wachter vant  Wat gaf hi hem te loone  Een vingerlijnc aen zijn hant  dat meysken hief op een liedeken  ende si sanck  Rijc god here vanden hemel  Waer den nacht noch eens so lanc     7  Die dit liedeken dichte  dat was een ruyter fijn  Hi heuet so wel ghesongen  Tamsterdam al inden wijn  Hi heuet so wel ghesonghen.  Ter eeren die liefste zijn  God sceyn dees nijders tongen  Bi schoon vrouwen ist goet zijn