93 Een oudt liedeken  1  ICk arm schaepken aender heyden.  Waer sal ic henen gaen  Mijn lief wil van mi scheyden  dat cost mi menighen traen  Waer sal icx mi onthouden.  Die ic laetst coos is troosteloos  Dus bliue ic inden rouwe     2  O radt van auontueren.  Wildi niet omme slaen   [fol. 54r]  Dat mi mocht | troost ghebueren.  Alsoot voormaels heeft ghedaen  Dus moet ick daer om trueren.  den bitter doot besueren  Och lief wilt dit wel verstaen     3  Ghi ionghers int hanteren  die nv ten spele gaen.  Met vrou venus camenieren  Ghi moecht int wilde slaen  Wildy altijt gheloouen  Peynst om dat eynde eer ghi beghint  So en wort ghi niet bedroghen     4  Ghelijc Sampson die stercke.  En verloos hi niet zijn cracht  Al door der vrouwen wercken.  Ende salmon wijs bedacht  Moest oock den doot besueren  die een yeghelijck can \ tsij wijf oft man  Brenghen in swaer dolueren.