Rome, 26 mei 1474
Sixtus bisscop, knecht der knechten gods. Onze beminde dochtre in gode perinette, dochtre van wijlen Jan Arnolfins, ruddre, ghebooren van Luuc, groetenesse en(de) paeuselike benedictie.
Wij zijn sculdich, Wij behoore(n en(de) wille(n) beionstich ghevonde(n) wesen den gheloften en(de) begheerten vanden vroeden maechden, de welke die v(er)smadende eens stervelicx mans bedde, beghee(r)en ghetraut te wordene den ghuene(n) die dald(er) precieuste es, voor allen menschen kindren. En(de) daero(m)me, huute dien, zo wij verstaen hebben, dat in de statute(n) en(de) costume(n) vanden cloostre van s(inte) clare(n) in brugghe, vand(en) oordene vand(er) zelv(en) s(inte) clare, sbisschopsdoms va(n) doorneken, ond(er) andren staet expresselic dat ne gheene p(er)soneghe int voors(eide) cloostre als no(n)ne ontfaen worde, ten zij dat zoe gheco(m)men zij van ghetrauden bedde. Ende ghij, zo ghij zecht, ghebrec hebt in huwe gheboorte, gheboore(n) en(de) ontbonden van wijle(n) Jan Arnolfini, Ruddre, gheboore(n) van Luuc, ghehuwet zijnde, begheert mette(n) ghemi(n)den dochtren in gode, mett(er) abdesse en(de) metten conve(n)te vand(en) voors(eide) cloostre int voors(eide) cloost(re) ond(er) tgheredelde habijt van duechden, den heer te dienene. Daero(m)me, wij willende hu voede(n) in hu loovelic propoost, voor wien de voors(eide) abdesse en(de) conve(n)t ons daer op oodmoedelike ghebeden hebben, en(de) Wij gheneghen zijnde in dit stic der supplicatie vand(er) voors(eide) abdesse, conve(n)te en(de) van hu, bijd(er) paeuseliker macht, na den inhoudene dese l(ette)ren, dese waerste alleenlic sp(eci)alic en(de) expresselic v(er)mindren den voors(eide) ghebreke ende allen andren, contrarie(n) in gheend(er) manie(ren) jeghenstaen(de). Bij specialer gracie v(er)leene(n) en(de) consente(ren) hu dat ghij muecht tvoors(eide) cloost(re) in gaen, en(de) ald(aer) muecht ontfaen worde(n) no(n)ne en(de) zustre, en(de) hu muecht conforme(ren) ond(er) svoors(eide) cloostre habijt en(de) ond(er) de reghelike justicien, en(de) dat ghij daer muecht eeuwelike vrij en(de) gheoorlooflic blive(n) en(de) den voors(eiden) en(de) allen andren statute(n) en(de) costume(n) vanden voors(eiden)
cloostre en(de) oordene, alle den welke(n) ooc bij eede paeuselike confirmacie ofte bij eenigher andre vromichede v(er)sterct, dezelve nochtan altoos and(er)s in hare volmaecte cracht blive(n)de. Hiero(m)me in ald(er) manie(ren) niemende en zij gheoorlooft in te bre-