[De rechter Carcer]

(fol. 61v) Carcer 13.	j Vanden geualle gemeenlic.	ij Vanden coninge.
	Dits teken der huysen, der platsen alre wiuen, ende der scepen, ende vertoocht hem den genen die reysen wille off wt trecken.	Sijn wesen wert goet bij den coninge ende tes hem orbairlic dat hij noch verbeyt.
	Dit betekent verholen dinc te vercrigene ende hol- dinc donkere steden, ende vertoecht hem den genen die wijf soect.	Hy wert geeert vanden coninge nochtan wertet hem arbeydelic.
	Dit betekent enen die arbeit om yet te vercrigene, ende heeft meesten arbeit gedaen, ende sijnen heesch is nakende.	Hy sal vanden coninge alle sijn dinc vercrigen.
	Dit is teken eens die soect ene dinc dat verre is van ogen welke sal belet werden int vercrigen.	Sijn heesch wert opgehouden een tijt dair na sal hij een deel der af vercrigen.
	Dit is teken dies die beroert is van siecten off anders, ende die omsiet vander woenste ende sal verbeyden.	Hoede hem welle dat hij niet en valle in vresen ende anxten, ende gehouden wert vanden coninge.
	Dit is teken des geens die soect dinc van enen die hij ontsiet, ende die nernst is op tuerlossen eens geuangens.	Hem sal moeynisse ende vrese vanden coninc toecomen, ende sal in sijne handen vallen, mer teynde goet.
	Dits teken der reysen, der wiuen ende van vele bekennens, der wiuen int geslachte ende vertoecht hem die huelic doen wille ende den genen de vraecht om meryen.	Hy sal den coninc staen te maten ende hem werden brieuen gesent.
	Dits teken eens die hueleke wille doen ende der wiuen, ende betekent verlies ende dingen vter hant gaende.	Hy hoede hem bi den coninc te bliuen om de scade, ende om den vall in den heesch.

(fol. 62r) iij Vandien die recht begert.	iiij Vanden gelde.	v Van hem die enich dinc soect.
Es de claghte van husen of van dieften, so wert een ouerdracht gemaect, ende van andren dingen niet.	Hy sal vercrigen gelt ende dat behouden, ende hi salt bedect houden.	Dit sal hi hebben by eens wijfs toedoene, ende soect hijt by enen andren so ne sal hijt niet vercrigen.
Dit wert gepaist onderlinge om lange tijden.	Hy sal goet vercrigen in vele manieren ende alremeest mit mercerye.	Den heesch van desen dinge wert wtgeset, ende hi sals een deel vercrigen.
Hy sal alle sijn begeerte vercrigen, ende te sijnen rechte comen.	Hy sal goet vercrigen te maten.	Dit sal hi snel hebben sonder letten.
Hy sal te sijnen rechte comen ende een deel dair af geuen.	Hem en sal niet mogen bliuen enen penninc mer de dagelicsche leeftocht.	Dit wert opgehouden so lange datmen in wanhopen der om wesen sal.
In dit plait sal hi te maten staen noch mit hem noch tegen hem, ende sal enen procurator setten, ende om lanc verlost werden.	Hy sal vercrigen goet ende hoeden, ende sal wat roekeloes wesen int verteren.	Hy sal dit vercrigen ende groet dinc ende dat hij begeert.
Hy sal mit crachte sijnen wederman verwinnen, ende te sijnen rechte comen.	Hy sal gelt vercrigen eenpaerliken ende altoes meer soude (... ?).	Niet en sal hi hier aff vercrigen ende tlaten best.
Hy sal sijn recht behouden na dat hij valscheit gesworen sal hebben ende het wert hem leet.	Hy sal van lettel vercrigens wesen, ende van lettel gelts ende ten sal hem niet bliuen.	Tversceeden van desen dinge is beter dan die soet, wantter scade in es, en si dat huelic si, dat sal hij vercrigen.
Hier sal scade in geuallen ende hi sal beleeftochten doen ende een deel sijns rechts vercrigen.	Hy sal lettel goets vercrigen mit sprekene ende by den toedoen der wiuen of van meryen.	Eest dat hij soect van verliese of van scriften, so salt hem gewerden, ende eest anders, nyet.

(fol. 62v)	vj Vanden hueleke.	vij Van der dracht.
	Dit wert een ygelic een bequame huelic ende geen dinc en sullen si volbrengen.	Dit wert een goede dracht ende gesont ende si sal een dochter baren, ende hebben een louelic eynde.
	Dit huelic en wert niet volcomen, ende haire tweer heesche of meeninge wert of gelaten.	Dese is gesont ende sal baren een dochter ende teynde louelic.
	Dit wert een huelic bequame ende gehelicht, ende is betekent ende bet meentmen datse maecht sij ende voirspoedich huelic.	Sy is biden barene ende sal een dochter baren, ende bede werden si verlost.
	Eest mogelic dat dit huelic versaemt wert tes onmogelic dattet lange tijt dueret, ende sal een bekent wijf wesen.	Dese sal baren na vele anxten, ende arbeits, ende sal gesont werden.
	Dit wert een bequame huelic goet ende gehelicht, op dat volbracht wert nochtan betekenet eene ontslegentheit, ende luttel durens.	Dese dracht wert voldragen ende sal een dochter sijn, ende gesont.
	Den heesch van desen man wert niet volbrocht in dit huelic ende wert belet ende af gedaen.	Dese dracht wert voldragen, ende sij sal enen zone baren geluckich ende gehelicht.
	Dit huelic wert lichts vercregens ende bequame ende dair en sall geen belet in vallen.	Sy wert gequest in haire dracht ende sal baren een dochter, ende sal gesont werden.
	Dit wert een gehelicht ende geluckich huelic, ende twijf sal hem mit groter mynne beseten hebben.	Es dit int beginsel van haren dragen so wert de dracht niet volbracht ende oic int laetste so sal sij eene dochter baren, ende te duchten is voir de dracht.

(fol. 63r) viij Vanden zieke.	ix Vander belegenre stat.	x Off si kint hebben sal.
Wert in de vrage fortuna maior off coniunctio, so sal hi steruen sonder twiuel.	Dit teken betekent sekerheit dair om en wertse niet gewonnen.	Sy sal kindren hebben.
Dese siecte wert verlanct ende hi sal van ziecte in siecten vallen ende te duchten is voir hem.	Het wert gepaist tusscen hair ende haren viant, ende wert een goet eynde.	Het wert lanc eer hi kindren gecrijcht, ende dair na salt hem geschien.
Dese en sal vander siecte niet genesen.	Tvolc van deser stat sal bezegelen of tekene geuen by sijns selues wille ende goet eynde nemen.	Sy sal kindren hebben, ende van hem geeert wesen, ende in groter bliscap sijn.
Dese siecte wert verlanct ende men hoept wat beters dairna.	Dit beliggen en sal niet dueren, want hi sal van der stat sceeden.	Si sal kindren hebben ende voer vele duchtmen in haire ioncheit ende van qualic sprekene.
Dese siecte wert verlanct wantse van bynnen in de borst, ende men hoept sijne gesonde.	Dese stat wert sterc ende gans, ende hair viant sal hair niet mogen deren.	Het wert lanc eer sij kindren ontfaet, mer dair na sal si ontfaen.
Te duchten is voir de doot van desen ziecken, en si dat hi enige remedie of wtstel dicwile hebbe.	Dese stat sal sonder scade ende sonder quetsene wesen in hair volc.	Sy sal kindren ontfaen in hare ioncheit ende ongeluckich wesen ende meest zonen.
Comt in de vrage coniunctio so wertet sijn doot.	Vele sonderlingheden sullen wesen tusschen der stat ende haren viant, ende dair om is voir hair te duchten.	Dese sal traech ende onmogende int bekennen der wiuen wesen ende lettel kindren hebben ende geenen zone.
Dit is teken des verlossens der siecte, ende te duchten is dat hi uervallen mach.	Dit betekent tuerlies ende scade der stat.	Si sal sonder kinderen sijn ende dat is best mits den ongelucke.

(fol. 63v)	xj Vander diefte.	xij Vander reyse.
	Dese diefte sal geopenbairt werden bynnen ses dagen, ende wertse niet vercregen dat sal belet doen.	Hy ne sal geen belet hebben in sijnen wech mer als een vogel vliegende.
	Dat heeft en wijf gestolen ende is dinc datmen vouden mach ende sal haest geuonden werden ende also tuerlies.	Dese reyse wert een lettel tijts opgehouden ende dair na sal hise doen.
	De dief noch tuerlies en wert niet wedercregen, ende sijn in steden dair men nernst is, ende ist dat mer na soect of vraecht, de diefte wert geuonden ende also tuerlies.	Dit wert een goet wech ende salich, ende hi sal goet ende bate vercrigen.
	Twedercrigen deser dieften ende des verlies wert verlanct ende wert der na vercregen by den toedoene van enen wiue.	Sijn voirtsetten wert afgeleit ende anders geset.
	Het mach sijn dat dit een sijn maech genomen heeft, ende wie dat siet en sal hem niet mogen spreken ende tuerlies wert wedercregen.	Tletten van deser reyse is beter dan thaesten, om de cleenheit des wasdoms.
	Dese diefte en wert niet geuonden ende tuercrigen des verlies wert lanc hi latet soeken varen dats best.	Hy ne sal de reyse niet doen ende hi salse sijns willen achterlaten.
	Dese diefte en wert niet wedercregen noch tuerlies.	Dit wert een goede reyse ende sall enen geselle hebben ende goet ende bate dair af vercrigen.
	Dit is een teken des verlies ende by desen tekene ne mach die diefte niet wedercregen werden noch tuerlies.	Dit wert een goede reyse van vele goets, ende groeien ende van lettel verbeydens.

(fol. 64r) xiij Van dien die van ogen is.	xiiij Vanden geuangene.	xv Vanden regen.
Dese en begeert genen wtganc vander stede dair hi is ende is belet van enen wiue.	Hy wert van carker te carker geleit ende wort schiere verlost.	Haest wert lettel regens dit iair ende de lettelheit en sal den volke niet deren.
Men hoep sijne coempste na lange tijt mit goeder baten.	Sijn vangen wert verlanct dair na wert hij verlost.	De regen wert opgehouden dit iair, ende der na werter bloet gestort.
Sijn wedercomen is nakende sonder vertreck, ende hi is gesont.	Hy wert van carker te carker verandert ende salre lange in bliuen.	Het sal ophouden van regene dit iair, ende den volke hindren.
Dese is als of hij achter de dore wair ende sterck ende rijck in sijnen wech.	Tuerlossen van desen geuangene is zere by.	Int eynde vanden iair salt meest regenen ende die regen sal vloeyen.
Sijn wechwen wert verlanct.	Dese sal lange geuangen bliuen, ende dair om is voir hem te duchtene.	Dit jair salt vele regenen ende genoech, ende den volke hinder doen.
Hy sal beroert werden van dier stede ter andre dan hij begeert.	Sijne vangenisse wert verlanget ende der na wert hi verlost gesont.	Dit jair salt regenen te mate ende ten mynsten naest.
Hy is in goeden state nochtan sal hi letten weder te comene.	Dese en mach niet haeste verlost werden.	Dit jair salt vele regens vallen, ende dair na sal hy mynderen.
Dese is in goeden staet ende wert dicwijle beroert voirt te comen.	Dit is teken des verlies ende hi ne sal voir oigen niet mogen comen.	Dit jair salt vele wayen ende te maten regenen, ende god weet.

(fol. 64v)	xvj Vanden begrauen dinge.	xvij Vanden comenscepen.
	Dit begrauen dinc is seker ende vreselic int ancomen mids der verheit int lant.	In dese comenscap is vele orbairs op dattet gepart si, ende ist anders niet.
	Dit is seker in twe steden ende des soekers meninge werter op gesterct ende sal te sijnre begeerte comen.	Dese is van vele verbeydens ende dair en is noch goet noch wasdom in.
	Dit is seker ende is emmer toe genomen een deel ende lettel bleuen, ende is int middel vander stede.	Hy sal in deser comenscap vercrigen bate ende wasdom na lanc.
	Hier en es niet begrauen.	Dese wert cleenre baten ende dair is orbairs in vele ende anxten.
	Dit is seker ende vele gracien sijnre in ende gaet die soeker toe hi sal vercrigen dat hi wille ende sijn stede is west wert.	In dese wert gracie ende orbair vele.
	Hier en is niet begrauen mer de naest liggende stede is seker ten oesten wert.	Hy sal in dese comenscap anxte liden sonder woirden, ende de bate is clene.
	Hier en is niet begrauen ende dair wert om gearbeit.	Hier en geen wasdom an, mer narer de scade.
	Hier en is niet ende dair heefft eens gedoluen geweest, ende niet geuonden dair om is tlaten best.	Es de comenscap van enigen paerden off dieren so est goet ende in andre dingen isse arbeydelic.

(fol. 65r) xviij Vanden wtgaenden heere.	xix Vanden toegaenden heere.	xx Vanden tween heeren.
Desen heere sal een sake toe comen die hem beletten sal wt te gane.	Dit wert belet toe te gane ende sal hem geuen teens anders dienste.	Tusschen desen tween heeren wert pais gemaict.
Dit heere sal wtgaen ende met deren, ende wert gepaist mit hem dairt toe gaet.	Dit heere wert beroert tot eenre ander stede, dan dairt begeerde te gaen.	Hare saken werden opgehouden ende hair wesen sal comen te paise ende teenen goeden eynde.
Dit here sal wtgaen ende vercrigen grote bate sonder arbeit onwerde ende rechten.	Dit sal toegaen ende nyemande deren, ende vele goeds vercrigen.	Een ygelic sal des anders pais begeren, ende sullen ter goeder wijs versamen, ende behouden bliuen.
Dit sal haest wtgaen ende sal vercrigen bate ende profijt sonder vechten.	Dit wert belet van gaen te sijnre stede, ende sal gaen in enen wech dairt letten sal.	Het wert pais onderlinge ende si en sullen niet versamen.
Te duchten is dat dit heere te traech wert, ende lanc saem in sijne werken.	Dit sal belet werden ende sal niet toegaen.	Het wert een wijch onderlinge ende der na werden si verscheeden ende gepaist.
Twesen van desen wtgaenden heere wert zere quaet ende tletten is hem best.	Twesen van desen heere wert opgehouden lange tijt, ende genoech.	Hier sal twist onderlinge in vallen ende hair twist dat sal stercelic vallen.
Eest dat wtgaet so is sijn vergaderen te duchten ende ten sal niet wtgaen.	Eest dat dit heere angaet het sal gequetst wedercomen sonder bate.	Hair beder wesen is der scade naest, ende sijn beyde cranc.
Men hoept desen here goet mit menichte der vresen die hem toecomen sal.	Dit sal sijn voirt setten achterlaten, ende niet toegaen dat is hem best.	Tversceyden wair desen twee heeren beter dan de toeloep om de vreese der scaden.

(fol. 65v)	xxj Vanden verholen dinge.	xxij Vander bedeuairt.
	Dat hier meest is dat sijn mine of dieren ende is dinc onder dinc of cantrarie den andre.	Hy sal gaen ende de bedeuairt doen ende nochtan sal hi hem letten.
	Hier is gewichte in off sonderlincheit van varewen.	Hy sal gaen mer hi wert gelett, dat hi de bedeuairt dit jair niet doen en sal.
	Hier is meest mijnen die onder hamers geleist heeft geweest.	Hy ne sal de bedeuairt dit jair niet mogen doen.
	Het mach wesen dat hier hemelsche varewe in es.	Dese bedeuairt wert belet ende tletten is best.
	Hier is meest mijnen ende der mach in wesen hartheit rontheit ende bleckinge.	Hy ne sal niet mogen gaen ter bedeuairt dit jair.
	Dit mach wesen van planten, ende mynen.	Dese en sal sijn bedeuairt bin den iare niet mogen doen al ist dat hi wech treckt.
	Hier in mach planten wesen ende lichticheit.	Dese bedeuairt en wert vanden jair gedaen.
	In dit verholen dinc is picture of bescreuen dinc.	Hy sal gaen ende onderwegen comenscap hantieren, ende belet sijn vander bedeuairt.

(fol. 66r) xxiij Vanden vechtere.	xxiiij Vanden coop der vruchten.	xxv Vanden geualle des iairs.
Hy ne sal niet mogen vechten, want het is een teiken des pais.	De coop blijft staende ande wert beter, ende mach niet dieren dit jair.	Dit wert een zere drachtich iair ende vol goets.
Hy sal wtgaen ende hi ne mach niet versaemt werden mitten genen dair hi iegen vechten soude.	De coop wert dit jair middelbair in orbairlicheden.	Dit wert een jair vol goets ende seker ende gracie is der in.
Hy ne sal den vechten niet naken, noch vechten dit jair.	De coop blijft staende ende sal sere ontdieren.	Dit wert een jair van vele gracien nochtan werter beroerte in.
Hy sal gaen mer niet te vechtene ende sijn vechten wert vertraecht.	De coop sal bliuen staende ende sal zere ondieren.	Dit wert een goet jair van vele gracien ende van vele reysen.
Tvechten is hem niet goet ende ist dat hi vecht, so is te duchten voir sijn vangnesse.	Te duchten is voir dier coop dit jair.	Dit wert een droge bedwongen ende anxtelic jair ende dit sal beteren int eynde des jairs.
Hy sal vechten ende in anxte comen ende goet einde nemen.	De coop blijft, ende der na wert hi ontslegen ende ondiere.	Dit wert een goet sterc jair nochtan wert tuolc beroert.
Hem is beter dat hi den vechtene niet en nake, om de vreese des verlies.	De coop sal bliuen staende ende veranderen int laetste vanden jare.	Dit wert een goet jair nochtan van lettel wasdoms den cooplieden in hair comenscap.
Eest dat dese te vechtene comt, so is te duchten dat hi wederkeren sall.	Int begintsel vanden iair so sal de coop dier werden ende der na beteren.	In dit jair werden onder tuolc vele sonderlingheden ende de geuallen der aff werden opgehouden.

(fol. 66v) 14	j Vanden geualle gemeenlic.	ij Vanden coninc.
	Dit is teken des bekens wijfs der maget des bants der penninge der packen der lakenen van menigerhande varewen als zijde.	Hy sal vanden coninge hebben blijscap gracie ende sal seker staen.
	Dit is teken der penningen ende der dingen die verblijden, ende eens baet soekers ende der dingen dair om gearbeit is.	Het is mogelic dat hem vanden coninc goet oirbair geschiede.
	Dits teken der mijnen van seluere ende alles wits dincs, ende teken vanden gelde der wiuen ende der kinderen.	Hy sal vercrigen vanden coninge dienste of clederen ende teinde wert moeilic.
	Dit vertoecht hem enen die gracie begert die opgehouden is een tijt, ende altehans wert hij verblijt.	Hy sal vercrigen gracie vanden coninge ende goeds vele na tijden.
	Dit is een teken der huysen der scepen der vlotten, ende van allen dingen hebbende sierheit ende vertoecht hem enen dien sonderlicheit hebben sal mit enen wederman.	Sijn wesen wert goet, ende sal goet vercrigen.
	Dit vertoocht hem enen die gearbeit heefft, om enich dinc ende is emmertoe iegenwordich ende sonderlingen saller in geuallen mer teinde wert goet.	Hy ne sal vanden coninge niet sceeden eer hij dat vercregen heefft, ende meer dan hij begeerde.
	Dits teken eens geuangens of siecs of eens scips, dat belet is van sijnre reyse, off der dingen der vele sonderlingheden af comen sullen.	Hem is beter dat hij den coninc niet bij en sij, want hem en salre geen goet af comen.
	Dits teken eens die wint begeert om de lettelheit des wints, ende hi ne cans niet af gelaten, nochtan dat hijs vèrre is.	Hy sal seker staen mitten coninc, nochtan en sal hem niet geschien dair hij na staet.

(fol. 67r) iij Vanden rechte.	iiij Vanden gelde.	v Van enigen dinge.
Men sal voir hem duchten ende hij sal bijden vonnisse ontfaen penninge ende grote bate.	Hy sal vele goets vercrigen ende hem salre gracie ende duecht aff geschien.	Men hoept tuolcomen van desen dinge ende alre meest ist dat byden toedoene eens wijffs coemt.
Hy sal in plaite ende in druck comen ende ten laetsten sal hij een deel sijns rechts vercrigen.	Hy sal vercrigen vele goets wt verre landen mit vrese ende sal rijc werden.	Hy wert belet dit te vercrigene ende het wert wtgeset ende hy ne salre niet aff hebben.
Hy sal lijden ende sal tonder gaen int vonnisse ende sal begeren enen wtset.	Dese sal goet vercrigen mit loesheden, ende ongerechticheden.	Hem sal vrese ende rouwe eerst toecomen, ende dair na sal hijt vercrigen.
Dese sal helpe hebben int vonnesse, ende verwin ende voirspoet.	Hy sal goet vercrigen van steden die in vreesen staen.	Dit wert een tijt opgehouden ende der na sal hijt vercrigen ende ontsien.
Hy en sal niet voleinden in dit vonnesse ende sal hem mogen ende sijn sake wert wten vonnesse gewijst of verboden.	Hy blijfft arm van lettel gelte, ende lettel vercrigens, ende hi ne sal geen gelt vergaderen.	Dit sal hi vercrigen na arbeyt ende cume sal hijt hebben.
Hem sal recht geschien na groten arbeyt ende wanhope.	Dese sal vercrigen goet te maten ende ten sal hem niet mogen bliuen.	Dit sal letten een tijt, ende der na sal hijt vercrigen ende in sijn hant hebben.
De rechter sal tvonnesse vten ende hem en salre goet off bate af comen.	Hy sal goet vercrigen mit anxte ende mit vreesen.	Dit sal hij vercrigen snel sonder arbeyt.
In dit gerechte wert vele gescils ende sijne sake wert middelbair.	Sijn goet sal hi swairlike winnen als off hijt wt harde steenen crabbelde ende altois arbeydende ende bate vercrigen.	Hy wert hier in belet ende salt af laten, ende traech wesen int soeken.

(fol. 67v)	vj Vanden hueleke.	vij Vander dracht.
	Dit vertoecht hem enen die mogende is des huelics ende is een bequame huelic ende blijde ende sal een bekent wijff wesen, off niet bekent.	Dit wert een gehelichde ende voirspoedige dracht ende si sal een dochter baren.
	Dit wert een blide vol bliscepen nochtan werter een verbeyden in ende lettel arbeits.	Hy sal baren ende vele siecten hebben ende si is bi den barene ende is een dochter.
	Dit werteen onuredelic huelic ende sullen bede scelden zeere ende en sullen niet connen gecrigen hare noodorfte.	Sy sal enen zone baren ende te duchten is voir hair int baren.
	Dit teken bederuet huelic ende betekent brieue van afgane ende een sceeden onderlinge.	Wert dese dracht voldragen so sal si baren een dochter die voirspoedich ende gehelicht wesen sall.
	Tbegintsel van desen huelic es den bederuene narer dan den toecomene ende geen dinc en sullen si volcomen.	Sy sal baren ende te duchten is voir hair na den barene van groter siecte of vander doot.
	Dit huelic wert onlanc ouer een gedragen ende der nae werter sonderlinghede in, ende dan hoeptmen beters.	In dit baren wert een vertrecken, ende si sal anxte lijden, mer teynde goet.
	Den heesch van desen huelic wert zere lichts vercregens nochtan wert teynde quaet ende niet goets dair in.	Dese dracht wert voldragen ende der na sal sij sien gelikenisse des bloets, ende te duchten is vanden ontidegen barene.
	Dit huelic wert te niet gebrocht ende ten sal niet mogen volcomen.	Men hoept dat si de dracht behouden sal na swaren arbeit die hair toecomen sal.

(fol. 68r) viij Vanden ziecken.	ix Vander belegenre stat.	x Off si kint hebben sal.
De meeste siecte de hi heeft dat is bloedigen vochticheit ende hi sal voirspoet ter gesonde hebben na der weke.	Tvolc van deser stat sal verwinnen ende sijnen viant bedwingen.	Si wert geluckich in hair kinderen, ende sal blide wesen, ende meest dochteren hebben.
Te duchten is voir dese siecte ende hi wert beweent ende wert in de vrage fortuna maior hi sterft.	Onderlinge sullen sij in die stat vechten mer teynde wert goet.	Sy sal kindren ontfaen om lanc, ende saller in verblijdt werden.
Sijn siecte is in den benen ende hi sal braken ende dat wert hem een sake der gesonde.	Twesen van deser stat sal quaet werden ende te duchten is voir hair.	Si sal een getal der kindren hebben, ende vele dochteren ende vele suller steruen.
Hy sal lanc siec bliuen mer teynde wert goet.	Dese stat sal behouden bliuen ende si wert gesekert vanden beligger ende sal lijden ongequetst.	Sy sal kindren hebben van goeden wesene, ende sal verbliden beede in de zonen ende in de dochteren.
Dese siecte is out ende teinde wert goet ende hi sal enen bitteren mont hebben.	Deser stat wesen wert quaet ende si wert gewonnen van haren viande.	Sy sal kindren hebben ende si werden geuoet van goeden wesene ende sal verb(l) iden bede in de zonen ende in de dochteren.
Dese siecte sal hem lange by bliuen ende meest is voir hem te duchten comt in de vrage fortuna maior.	Vele sullen vter stat vlien nochtan en salse geen liden hebben.	Sy sal kindren ontfaen na datter vele tontide sullen geboren wesen.
Men ducht voir dese siecte ende hi en sal geen hinder hebben sijns lijffs off gebreck, mer hi sal in anxte wesen.	Es dese stat gelegen bider zee so duchtmen dair voren ende heeftse scepen so en duchte men niet.	Sy en sal geen kindren mogen ontfaen ende est dat sijse ontfaet, si sullen tontijde geboren werden.
Dese sal gesont werden ende een salich eynde nemen.	Dese stat is sterc genoech ende hair viant saller van sceeden sonder hinder.	Tontfanc der kindren, wert opgehouden, tes si der af in wanhopen es, ende int laetste van haren leuen sal si se ontfaen.

(fol. 68v)	xj Vanden begrauen dinge.	xij Vander reyse.
	Dit is seker ende goet, ende dair wert een scat in geuonden ende is in de middel vander stede diemen waent dat is.	Sijn wech wert goet ende gehelicht ende hij salre grote bate af gecrigen.
	In dese stede is seker dinc begrauen nochtan wertet moeylic arbeidelic ende lanc eer ment gecriget.	Hy sal lang wt wesen ende sal versoeken religiose steden ende een rijc wijff trouwen.
	Hier en is niet begrauen.	Sijn geuallen sullen quaet werden inden wech, ende onmogelic wert dat hi wedercame.
	Dit begrauen is seker, ende gracien werder in geuonden.	Hy sal de reyse doen ter zee ende goet vercrigen.
	Hier en is niet begrauen.	Hy sal reysen ende rijden twiersins ende gesont bliuen.
	Hier is wat begrauen onder den muer, of onder de want, of inden huec, ende de toeganc is verre.	Sijn wech wert vertraecht ende belet ende cort, dair na sal hi reysen.
	Hier en is niet begrauen.	Sijn wech wert quaet ende bi lichte hi sal wedercomen, ende sijn dinc niet voldoen.
	Hier en is niet begrauen.	Hy sal reysen ende sinen wech langen sonder wasdome ende bate.

(fol. 69r) xiij Vandien die van ogen is.	xiiij Vanden geuangene.	xv Vanden regen.
Dese is in gracien ende sijn wederkeren wert verlangt ende der na sal hi comen in goeden state.	Twesen van desen geuangen is ten verliese ende in anxte.	Vele wolken sullen hem vertogen anden hemel, ende lettel salt regenen.
Hy ne mach nu niet comen want hi geert de stede daer hi is.	Sijn vangen wert verlanget ende te duchten is dat hi sterue inden karker.	Dit jair salt zere luttel regenen dair den volke hinder af comen sal.
Sijn wedercomen wert verlett wairom hi hem ontsien mach van sijnen wederman.	Hy sal vlien vanden carker ende een ander mit hem, ende behouden bliuen.	Dit jair salt genoech regenen ende in eenrehande landt meer.
Hy sal haest comen verlicht met vele gracien.	Dese wert verlost ende gesont bliuen, nochtan salmen op hem scrijuen.	Dit jair sal vele regens vallen sonder aflaten.
Hy sal haest wedercomen.	Hy wert snel ende haestelic verlost.	De regen wert van vele sonderlingheden als nv salt regenen als nu niet.
Hy ne meent niet weder te comene als nv ende hij wert belet.	Sijn sake wert opgehouden een tijt, mer teynde wert goet ende hi wert verlost.	De regen wert opgehouden een tijt ende dair na sal hi vallen.
Dese is als off hi waere buten der doire, men drage hem sijn auontmael, want hi is hier by.	Sijn vangenisse wert seere verlanget.	Dit jair salt regenen genoech sonder ophouden.
Syn wedercomen wert wtgeset ende sal in een ander lant gaen ende der na wedercomen.	Hy wert verlost nae zeere lange tijt.	Dit jair salt regenen te maten ende twasdom sal vloyen.

(fol. 69v)	xvj Vander diefte.	xvij Vander comenscip.
	Dese diefte mach wesen dierbair dinc, ende de dief wert geuonden na tijt ende so wert verlies.	De geuallen hier aff werden goet ende hi salre bate aff vercrigen.
	Dese diefte en wert niet geuonden noch tuerlies.	Hy sal gemoeit werden in dese mercerie om lancheit nochtan sonder schade.
	Tes mogelic dat in dese diefte iet sij van ziluere ende wert geuonden bi enen sonder bairt ende also tuerlies.	De geuallen werden hie(r) af middelbair nochtan is hire in duchtende.
	Hier af wert tuinden verlanget, ende tuerlies wert om lanc vercregen.	Hy saller in goet ende bate vercrigen ende alre meest op dat si verlechtende sijn.
	Dit wert verandert van hande te hande ende hope van wedervindene als der wat af gedaen sal wesen, ende tuerlies en wert niet geuonden.	Dese mercerie is quaet, ende schade saller in geuallen ende tlaten best.
	Tvinden van deser diefte wert verlangt want si begrauen is in de eerde ende ommogelic wert dat si haest geuonden werde ende tuerlies en wert geuonden.	Behout si dese comenscip si is van tragen vercopene sonder enige scade.
	Dese diefte is geuende vanden naesten ende emmertoe isser wat af verloren ende tuerlies wert wedergecregen.	Dese wert int ierste licht, dair nae werter arbeit ende gepeins in.
	Tvinden van deser diefte wert verleit ende de heere dair aff wert vertroest ende tuerlies mach geuonden werden.	Dese comenscip waere best achtergelaten om den groten arbeit dier in is.

(fol. 70r) xviij Vanden wtgaenden heere.	xix Vanden toegaenden heere.	xx Vanden tween heeren.
Dit heere sal den besten geualle naest wesen.	Dit en sal niet toegaen all is sijn daet ende sijne crachten openbair.	Twesen van bede desen heeren sal gelijc vallen ende si en werden niet versaemt.
In dit heere sijn vele vechters van machte, ende van verwinne.	Sijn sake wert belet, ende vreese ende geslach van swerden, ende anxten saller in vallen.	Eest dat dese toeloepen so salt de beghinre winnen.
Eest dat dit heere wt gaet hem saller quaet aff comen.	Dit heere sal bliuen ende sal vrese hebben staende in sijn stede.	Tes onmogelic dat onder dese twee heeren een toelope come.
Sijn dat wert opgehouden ende ontslegen, ende en sal niet wtgaen.	Eest dat dit heere toegaet hem en sal niet gescien dan goet.	De toeloop van desen twe heeren wert verandert.
Dit heere salt verwynnen ende hem wert gehulpen ende sijn dinc behouden ende sijn wesen sal gesterct werden.	Onmogelic ist desen heere te gane vander stede dairt is.	Est dat sij toegaen so sullen sij gelijc staen.
Dit heere en sal niet wtgaen al est sterck ende geholpen.	Het wert belet vanden toegaen ende het sal in discorde of in sonderlingheden wesen.	Deser twier heeren dinc wert opgehouden ende sij en sullen niet vergaderen.
Dit heere en sal niet vertrecken ende sijn letten is beter dan den wtganc.	Een deel van desen heere sal toegaen ende vele suller aff vlien.	Dese en sullen niet vergaderen want teen tander ontsien sal.
Dit sal wtgaen ende sijne werc niet volbrengen ende sijn eynde wert goet.	Dit heere sal toegaen.	Sy sullen onderlinge woerden hebben ende baden (!) sonder toeloop.

(fol. 70v)	xxj Vanden verholen dinge.	xxij Vander bedeuairt.
	Dat hier meest is dat is van mine.	De bedeuairt wert dit iair opgehouden ende dair na wertse gedaen.
	Dit is van dien dat int vier gaet.	Hy sal de bedeuairt doen blidelike sonder enich belet.
	In dit verholen dinc is tmeeste een dier, ende daer mach witheit in wesen.	De bedeuairt en wert binnen den iare niet gedaen.
	Dit is van dieren.	Hy sal de bedeuairt veranderen, ende anders gaen.
	Hier is meest planten in in de erde wesende.	Dese bedeuairt en wert vanden jair gedaen, ende sijn meninge werter af verandert.
	Dit is van planten wiueliker namen.	Hy sal de bedeuairt achterlaten dit jair sijns willen.
	Dat meest hier in is mach van mine wesen.	Hy sal sijne raet veranderen ende de bedeuairt achterlaten dit jair.
	Dit mach wesen van drogen planten.	Eest dat hi bestaet de bedeuairt te doene hi mach hem moeien dit jair mer si en wert niet gedaen.

(fol. 71r) xxiij Vanden vechtere.	xxiiij Vanden coop der vruchten.	xxv Vanden geualle des jairs.
Eest dat hi vechtet soe is te duchten voir bloetstortinge dair tuechten sake af wesen sal.	Int beginsel vanden iair wert de coop dier sonder hinder.	Dit wert een goet jair mer vele siecte ende quellinge van bloede.
Begint hi te vechten, hi sal verwinre werden gehulpen.	Int beginsel des iairs wert de coop dier, der na wert hij ontslegen int eynde.	Dit wert een salich iair al vallenre wigen ende striden in.
Den heesch van desen vechtene wert ontslegen mids der vrese ende tlaten is best.	De coop wert dit jair middelbair.	Dit jair wert middelbair int goede ende in quade.
Hy en sal niet vechten noch geen quaet noch twist sal hem geschien.	De coop wert dit jair zeere ondiere, ende de granen onuercopelic.	Dit wert een jair van goeden geualle, ende van vele gracien onuercopelic.
Vecht hi, hi sal verwinnen.	De coop blijft staende, ende wert verandert.	Dit jair wert van vele gracien ende goets genoech.
Dese wert gehoet ende niement en sal hem verwinnen in vechtene noch in stridene.	De coop wert opgehouden int beginsel des jairs, ende dair na ontslegen.	Dit wert een jair van vele goeds, ende lettel sonderlincheden.
Hy sal vanden vechtene wederkeren, ende van desen jair voluechten.	De coop wert narer der ondierne dan den dierne.	Dit wert van vele goets, ende gracien, ende vele dragende sullen tontide baren.
Dit vechten wert opgehouden dit iair, ende wert van hem verre.	De coop wert een luttel op gehouden, ende dair nae ontslegen.	Dit wert een goet jair mit geruchten, ende wigen sonder hinder.